Арқаны кеңге салуға болмайды

Күздің жиын-теріні аяқталып қалды  екен деп босаңсуға әлі ерте. Әсіресе, Арқа өңірі үшін! Алда қытымыр қыс­тың үскірік аязы мен долдана соғар бораны алмас қылыштай жалаңдап тұр. Былтыр жағалары жайлауда жүргендер «үсті-бас ақ қырау, түсі  суық» жаннан таяқты оңбай жеген болатын. Алайда, алдағы қысқы маусымға әзірлік барысы кей басшыларды әлі де ойландырып-тол­ғандырмайтын тәрізді. Осынау маңыз­­ды мәселені талқылауға арналған  басқосуға бірқатар жауапты мемлекеттік орган басшыларының  төбе көрсет­пей орынбасарларын жіберуі «төтенше жағдайларға» алдымен жауапты екендіктерін естен шығарып алса керек. Облыс әкімінің бірінші орынбасары Айдарбек Сапаровтың төрағалығымен өт­кен басқосуда  гидроқұрылғылардың апат­сыз жұмыс істеуін қамтамасыз ететін азаматтық қорғаныс шараларын орындаудағы алдағы міндеттер жан-жақты талқыланды. Облыстық төтенше жағдайлар жө­нін­дегі департамент бастығының орын­басары  Александр Швецов алда қыруар істер күтіп тұрғанын, ең бастысы, на­зар­ды жылыту қосындарын құру қажет­тігіне, жедел құтқару топтарын арнайы техникалармен жабдықтауға аударды. Аязды, боранды күндері  елді мекендер  арасында байланыстың үзіліп қалу жағ­дайлары жиі кездеседі. Сондықтан  жеткілікті азық-түлік, медициналық препараттар қорын жасау қажеттігін айта келіп, өткен қыста бірқатар проблемалар туындағанын еске салды. «Солтүстік Қазақстан гидрометеорологиялық орта­лығы» директорының орынбасары Қым­бат Мерғалимованың ақпараты да жи­налғандарды қуанта қойған жоқ.  Ал­дын-ала болжамға қарағанда, қыраулы қыстың қытымыр мінезі аз болмайтын тәрізді. Дәурені жүрісімен-ақ сынап бағасы 30 градусқа жетіп, тіпті одан да төмендейтін көрінеді. Сондықтан ба­рын­ша сақтанған жөн, деді ол.  Кезек энер­гетика және коммуналдық шаруа­шылық басқармасының бастығы Антон Федяевқа келгенде жиналыс сайын сын­нан көз ашпайтын бұл сабазың не айтар дегендей  зал іші сілтідей тына қалды.  Жоқ, бұл жолы оның баяндамасының тігісі жатық шықты. Сірә, өткір сындар біраз ширатқан болу керек. 3 қазаннан бастап 590 ғимаратқа жылу беріліпті.  Білім және денсаулық мекемелері бірінші кезекте қамтамасыз етіліпті. Петропавл қаласы әкімінің орынбасары Антон Макаров  тұрғын үйлер түгелге жуық  жылыту маусымына тас-түйін дайын еке­нін мәлімдеді. Су тарататын құбыр­лар­дың жарамдылығы тексеруден өтіп, орын алған кемшіліктер дереу түзеті­ліп­ті. Керісінше,  Солтүстік Қа­зақ­стан  электр желілерін тарату ком­па­ниясы­ның бастығы Виктор Тен  электр қуа­тын қабылдау жөніндегі құжаттар тап-тұйнақтай әзір етілмегендіктен, бірқа­тар әлеуметтік-тұрмыстық нысан­дар­­дың жарықсыз қалу қаупі бар дей келіп, өрттің жартысына жуығы электр сым­да­рының тұйықталуы салдарынан  орын алатынын ренішпен жеткізді. Кеңесте  автокөлік жолдары комитеті жергілікті департамент бастығының орынбасары Арман Жүсіповтың, жолаушылар тасы­ма­лы  және автокөлік жолдары басқар­ма­сы бастығының орынбасары Серік Мұхамадиевтің біраз қызаруына тура келді. Облыстық ма­ңыз­дағы жолдарды күтіп ұстау мәсе­лесіне қатысты арыз-шағым көбеймесе, азаяр емес. Мәсе­лен, Ғ.Мүсірепов ау­данында  жауапты орын­дар­дың сал­ғырт­­тығынан жолда батып қалған көліктер мен адамдарға көмек  кешігіп жеткен. Жол белгілерін қалпы­на келтіруде де кемшіліктер жоқ емес. Жиында 2011-2012 жылдардағы қысқы маусымда  ТЖМ аумақтық құры­лымдары мен жергілікті басқару орган­дарының әзірлігін күшейту міндеттері белгіленді. Өмір ЕСҚАЛИ. Солтүстік Қазақстан облысы.