Мінбеге бірінші болып көтерілген «Білім» комиссиясының төрайымы, облыстық мәслихаттың депутаты Ғабура Бөстекованың айтуынша, үш ауысымдық және апатты жағдайдағы мектептердің мәселесі толық шешілген. 3 пен 6 жастағы балдырғандарды мектепке дейінгі мекемелермен қамту 99,6 пайызды құрайды.
Ол өз сөзінде қалада жұмыс істейтін 125 қысқа мерзімді шағын орталықтарда білім, тәрбие сапасының төмендігін айта келіп, олардың санын қысқартуды ұсынды. Керісінше, «Береке», «Жас өркен» шағын орталықтары балабақшаға мұқтаж. Сол сияқты 3 жасқа дейінгі балақайларды мектепке дейінгі тәрбиемен қамту жайы да өткір күйінде қалып отыр. Мемлекет-жекеменшік әріптестігі шеңберінде 19 ғана мекеме бар. Бұл салада ілгерілеу баяу. Әсіресе, педагог кадрларының жетіспеушілігі айқын сезіледі. Бүгінгі таңда 253 штат бос тұр. 47 математик тапшы. Оның бірден-бір себебіне ауылдық жерлердегі оқушылар санының аздығы көлденең тартылды.
Облыстық филиал төрағасы, аймақ басшысы Құмар Ақсақалов ауылдық мектептерде 6-7 бала оқыса да, сапалы біліммен қамтамасыз ету басты талап болып табылатынын, мәселені жан-жақты саралау қажеттігін, орын алған кемшіліктерді жоюға жергілікті атқарушы орындарды да жұмылдыруды атап көрсетті.
Облыстық білім басқармасының басшысы Гүлмира Кәрімова өз хабарламасында білім беру саласында 15846 мұғалім еңбек ететінін, олардың 53 пайызы жоғары және бірінші санатқа ие екенін жеткізді. Жаңартылған бағдарлама шеңберінде 8400 оқушы білім алған. Жаңа оқу жылынан бастап 30 мың оқушы қамтылмақ. «Дипломмен – ауылға» бағдарламасы аясында былтыр 360 жас маман елді мекендерге орналастырылса, биыл 510 маман келеді деп күтілуде. Атқарылған жұмыстарға қарамастан жас мамандардың үлесі 3,8 пайыз ғана. Оларға әлеуметтік қолдау жан-жақты жасалмайтындықтан, тұрақтай бермейді. Университет пен колледждерде педагог мамандықтары аз дайындалатыны көптен бері көтеріліп келеді. Кей мамандықтар бойынша 5-6 адам ғана оқиды. Ұлттық бірыңғай тестілеу қорытындысы қанағаттандырмайтынын атап көрсеткен Құмар Іргебайұлы жағдайға талдау жасауды жүктеді.
Мамлют ауданының әкімі Ерболат Бекшенов пен «Нұр Отан» партиясы Қызылжар аудандық филиалы төрағасының бірінші орынбасары Данияр Әбутәліп «Ардагерлерді ардақтайық!», «Кедергісіз келешек» бағдарламаларының орындалу барысы жайлы баяндады. Мамлют ауданында 25 іс-шара өткізіліп, мүмкіндігі шектеулі 6 адам жұмысқа орналастырылған. Ғимараттарға қиындықсыз кіру үнемі қадағаланып отырады. Қызылжар ауданында жеті жоба бойынша 236 шара ұйымдастырылып, оларға 7 мыңнан астам адам қатысқан. 343 қария мен 17 міскін жанға тұрақты қолдау көрсетіледі. «Бақытты балалық шақ» жобасы аясында 102 жетім бала қамқорлыққа алынған. Тұрғындардың сұранысына зер салу, күнделікті тұрмыс-тіршілігін білу аса маңызды. Өкінішке қарай, кей жерлерде бір мүгедек жанды ай сайын жұмысқа орналастырып, бірнеше жаңа жұмыс орнын ашқан сияқты есеп беру фактілері кездеседі, деді филиал төрағасы. Осы жағын ықтияттауды міндеттеді.
Филиал төрағасының бірінші орынбасары Артур Молдағұлов саяси ұйымның «Бірлік. Тұрақтылық. Жасампаздық» атты сайлауалды бағдарламасының 8 бағыты бойынша партиялық кураторлардың атқарған жұмыстарына талдау жасап, кейбіріне көңіл толмаушылық білдірді. Тапсырылған учаскелерге жүрдім-бардым қараған «Индустриялық даму» комиссиясының төрағасы Қуаныш Бишімов пен «Шағын және орта кәсіпкерлікті қолдау» сараптама тобының үйлестірушісі Гюлага Илдырымовқа партиялық жаза қолдану ұсынысы мақұлданды.
Қ.Ақсақалов алдағы уақытта мұндай депутаттардың кураторлыққа лайықты-лайықсыздығын шешуді тапсырды. Партиялық жобалар шеңберінде жүзеге асырылатын іс-шаралардың ауқымдылығымен қоса, сапасы басты назарға алынуын ерекше ескертті.
Өмір ЕСҚАЛИ,
«Егемен Қазақстан»
Солтүстік Қазақстан облысы
