Бағдарламалар бақылауда
Елбасы Нұрсұлтан Назарбаев өткен жұмада өңірлерді әлеуметтік-экономикалық дамыту мен мемлекеттік бағдарламаларды іске асыру бойынша арнайы кеңес өткізген болатын. Кеше Үкімет отырысында Б.Сағынтаев осы кеңесте белгілеген міндеттерді іске асыру шараларын пысықтады. Жауапты мемлекеттік органдарға және әкімдіктерге «Нұрлы жол» мемлекеттік бағдарламасы бойынша қаражаттарды игеру мәселесін тұрақты бақылауда ұстауды тапсырды. Әсіресе, білім беру нысандарына қатысты жұмыстарды ерекше назарға алу керектігін айтты. Осыған орай, Ұлттық экономика министрлігіне ай сайын нысандардың уақытылы өткізілуіне мониторинг жүргізіп, Үкіметке ақпарат беріп отыруды тапсырды.
Сондай-ақ, «Нұрлы жер» бағдарламасы бойынша Инвестициялар және даму министрлігіне «Бәйтерек» холдингімен және өңірлердің әкімдерімен бірлесіп 1 қазанға дейін бағдарламаға екінші деңгейлі банктерді белсендірек тарту мен оны іске асырудың тиімділігін арттыру үшін бағдарлама тетіктеріне түзетулерді қарастыратын Үкімет шешімінің жобасын енгізу туралы тапсырма берілді. Оған қоса, Инвестициялар және даму министрлігіне Ақпарат және коммуникациялар министрлігімен бірлесіп бағдарлама тетіктерін ақпараттық сүйемелдеу бойынша медиа-жоспарды бекітіп, аталған жұмысқа облыстардың әкімдерін тарту жүктелді.
Үкімет басшысының мәлімдеуінше, Индустриялық-инновациялық даму мемлекеттік бағдарламасы бойынша цифрландыру мен жаңа технологияларды енгізу тұрғысынан бағдарламаның тиімділігін арттыру қажеттігі туындап отыр. Осыған орай, Инвестициялар және даму министрлігіне әкімдіктермен және мүдделі ұйымдармен бәсекеге қабілетті экспорттық өндірістерді дамыту бойынша жұмысты үйлестіруді тапсырды. Сондай-ақ, Премьер-Министр өңірлердің әкімдеріне индустрияландырудың өңірлік карталары аясында енгізілген, барлық тоқтап тұрған кәсіпорындарды іске қосу бойынша нақты жұмыстарды жүргізуді және 1 желтоқсанға дейін олардың жұмысын қайта жандандыруды тапсырды.
Ал агроөнеркәсіп кешенін дамыту бойынша Ауыл шаруашылығы министрлігіне Қазақстанның қаржыгерлер қауымдастығымен, «Атамекен» ҰКП және облыстардың әкімдерімен бірлесіп бір айлық мерзімде ірі агрохолдингтерді қаржылық сауықтыру жұмыстарына егжей-тегжейлі талдау жасап, Үкіметке тиісті ұсыныстар жіберу жүктелді. Бұдан өзге, Үкімет басшысы өзара сақтандыру қоғамдарының қызметін реттеу арқылы, 2018 жылғы 1 қаңтарға дейін өсімдік шаруашылығындағы міндетті сақтандыру мәселелері бойынша заңнамаға өзгерістер мен толықтырулар әзірлеу қажеттігін айтты.
Нәтижелі жұмыспен қамту және жаппай кәсіпкерлікті дамыту бағдарламасын іске асыру аясында Еңбек және халықты әлеуметтік қорғау, Ұлттық экономика, Қаржы және Ауыл шаруашылығы министрліктеріне өңірлердің әкімдерімен бірлесіп, Үкіметке аймақтық квоталарды ұлғайту, еліміздің оңтүстік өңірлерінен солтүстікке ерікті түрде көшуге ынталандыру және қажетті есептерді дайындау бойынша ұсыныстарды Үкіметке жіберу тапсырылды.
Премьер-Министр, сонымен қатар, Ұлттық экономика министрлігі мен Ауыл шаруашылығы министрлігіне әкімдермен бірлесіп, бір ай ішінде халықты шағын несиелендірумен қамтамасыз ету көлемін ұлғайту, соның ішінде «Бизнес-Бастау» жобасы бойынша қаржыландырылған стартаптардың үлесін арттыру туралы тапсырмалар берді. Өңір әкімдеріне бағдарламаны іске асыру аясында азаматтарды зейнетақы жүйесіне және міндетті әлеуметтік медициналық сақтандыруға тарту үшін тұрақты жұмыс орындарын ашуға ерекше көңіл бөлу қажеттігін ескертті.
Ұлттық экспорттық стратегия тұрғысынан Инвестициялар және даму министрлігіне тиісті мемлекеттік органдармен бірлесіп, бір айлық мерзімде экспорттаушыларға қолдау көрсету мәселесінде министрліктердің, жергілікті атқарушы органдардың және «Kazakh Еxport» ұлттық компаниясының жауапкершілік аймақтарын бөлу бойынша нақты ұсыныстар беру жүктелді.
Бұдан өзге, Ұлттық экономика министрлігіне жауапты мемлекеттік органдармен және үкіметтік емес ұйымдармен бизнеске «Азаматтарға арналған үкімет» корпорациясының қызметі тәрізді мемлекеттік қызметтерді көрсету бойынша ұсыныстарды зерттеп, ұсыну, сондай-ақ, Мәдениет және спорт, Білім және ғылым, Ақпарат және коммуникациялар, Дін істері және азаматтық қоғам, Қаржы министрліктеріне, өңірлердің әкімдіктеріне «Рухани жаңғыру» бағдарламасы аясында жобалардың уақытылы іске асырылуын жеке бақылауға алу тапсырылды.
Заң жобалары қаралды
Кешегі Үкімет отырысында «Кедендік реттеу туралы» кодекстің жобасы және ілеспе заң жобалары, сонымен қатар, «Қазақстан Республикасының кейбір заңнамалық актілеріне бюджет заңнамасын жетілдіру мәселелері бойынша өзгерістер мен толықтырулар енгізу туралы» заң жобасы қаралды. Талқылау қорытындысында бюджет заңнамасын жетілдіру туралы заң жобасы мақұлданды.
Ұлттық экономика министрі Тимур Сүлейменовтің мәлімдеуінше, «Қазақстанның кейбір заңнамалық актілеріне бюджет заңнамасын жетілдіру мәселелері бойынша өзгерістер мен толықтырулар енгізу туралы» заң жобасы Мемлекет басшысының биылғы Қазақстан халқына Жолдауында берген тапсырмаларын, Ұлттық қорды құру және пайдаланудың жаңа тұжырымдамасын, сондай-ақ, Парламент және Есеп комитетінің ұсынымдарын іске асыру мақсатында әзірленген. Заң жобасымен бюджет заңнамасына 6 негізгі бағыт бойынша түзетулер ұсынылуда. Бұл орталық және жергілікті деңгейлердегі 1,5 мыңнан астам құжатты қысқартуға мүмкіндік береді.
Бюджеттік бағдарламаларды іске асыру кезінде әкімшінің дербестігін кеңейту аясында бюджетті нақтылаусыз бюджеттік жобалар арасында қаражатты қайта бөлу мүмкіндігін қарастыру ұсынылды.
Ұлттық экономика министрі сондай-ақ, «Қазақстан Республикасындағы кедендік реттеу туралы» кодекс жобасымен таныстырды. «Соңғы үш жыл ішінде Еуразиялық экономикалық комиссия алаңында ЕАЭО-ның жаңа Кеден кодексін қалыптастыру бойынша көлемді жұмыстар жүргізілген, ол қазір ратификациялау рәсімінен өткізіліп жатыр», деді Т.Сүлейменов.
Жаңа одақтық кодекс барынша қайта өңделіп, кедендік реттеудің негізгі тәсілдері қайта қаралған. Осыған орай қолданыстағы ұлттық кедендік заңнаманы жаңа кедендік ережелерге сәйкестендіру мәселесі көтерілген. Сегіз айлық жұмыстың қорытындысы – Кеден кодексінің жаңа жобасы болып отыр.
Министрдің айтуынша, жаңа Кеден кодексінің қолданыстағы кеден заңнамасынан басты айырмашылығы – кедендік реттеудің жаңа тәсілі. Жаңа реттеудің негізгі қағидасы – кеденде бизнес үдерістерді автоматтандыру.
Жаңа кодекспен бір уақытта оған ілеспе заң жобасы әзірленген, ол бірқатар кодекстер мен заңдарға өзгерістер енгізуді қарастырады. Бұдан өзге, тауарларды жоюдың кедендік рәсіміне орналастырған жағдайда мемлекеттік экологиялық сараптаманы беру тұрғысынан Қазақстан Республикасының Экологиялық кодексіне өзгерістер енгізіліп жатыр. Бюджеттік кодекске аванстық төлемдер нормаларын реттеу тұрғысынан түзетулер енгізілуде. Сонымен қатар, көліктік бақылау функциялары және тағы басқалар тұрғысынан кейбір заңдарға түзетулер енгізіліп жатыр.
«Осылайша, жаңа Кеден кодексі Қазақстанға транзиттік және экспорттық әлеуетті пайдалануға мүмкіндік беретінін, сыртқы экономикалық қызметті жүргізуді жеңілдететінін сенімді түрде айтуға болады», деді Т.Сүлейменов.
Премьер-Министр Б.Сағынтаев мемлекеттік органдарға отырыс барысында айтылған барлық ескертулерді пысықтап, қажеттігінше өзгерістер енгізу туралы тапсырма берді.
Динара БІТІК,
«Егемен Қазақстан»