Ресей АҚШ-тың Еуропада зымыранға қарсы қорғаныс жүйесін құруына жауап ретінде әскери-техникалық шаралар қабылдай бастады. Кремльдегі жоғары дәрежелі дерек көзінің сөзіне қарағанда, Ресей билігі қазірдің өзінде не істеу керек екенін айқын ұғынып отыр.
Біздің жауабымыз, дейді ол, арзан болады, бірақ аса тиімділігімен ерекшеленеді. Жоғарыдағы лауазым иесінің айтуынша, америкалықтар Еуропадағы жүйесін Ресей пікірімен есептеспей құрғылары келеді. Ал мұндай біржақты шешіммен еш келісуге болмайды. АҚШ тарапы өздерінің нысандары Ресейге қарсы бағытталмайтынын көлденең тартып отыр.
ЛИВИЯНЫҢ ӘУЕ КЕҢІСТІГІ АШЫЛАДЫ
Ливияның ұлттық өтпелі кеңесі НАТО-мен коммерциялық авиация үшін өзінің әуе кеңістігін ішінара болса да ашу туралы уағдаластыққа қол жеткізді. Рейстерге Ливияның азаматтық авиация басқармасы қызмет көрсетпек. Бұл елге гуманитарлық көмек жеткізуге де қолайлы жағдай туғызғалы отыр.
Ұлттық өтпелі кеңес пен НАТО арасындағы уағдаластық жақын арада күшіне енбек. Бұл 1973 жылғы Ливияның әуе кеңістігінде ұшуға рұқсат бермейтін БҰҰ Қауіпсіздік Кеңесінің қарары күшінде тұрғанына қарамастан, жүзеге аспақшы. Кейінірек біртіндеп қарардың күшін жою көзделген. Бірақ, ол ұлттық өтпелі кеңестің елде қаншалықты жылдам тәртіп орнататынына тікелей байланысты болмақ.
ОБАМА ИРАНДЫ ЖАУАПҚА МӘЖБҮРЛЕМЕК
АҚШ президенті Барак Обама Иран басшылығы Сауд Арабиясының АҚШ-тағы елшісін өлтіруді жоспарлағаны үшін жаза тартуы тиіс деп мәлімдеді. Бірақ ол Иранның рухани көсемі Әли Хаменеи мен ел президенті Махмұд Ахмадинежадты тікелей айыптаған жоқ.
Сөйтіп, Б.Обама Теһранға қатысты ең қатал шара қабылдауға шақырды. Вашингтон Саудия елшісі Әдел әл-Жубейраға қастандық ұйымдастыруға қатысты 11 қазан күні айыптаған мәлімдеме жасаған еді. Федералды тергеу бюросының нұсқасы бойынша, елші АҚШ аумағындағы мейрамханалардың бірінде жарып жіберілмек екен.
ҚАҚТЫҒЫСТА 36 АДАМ ОПАТ БОЛДЫ
Сирияда оппозиция өкілдері мен президент Башар Асадтың жақтастары арасындағы қақтығыс барысында 36 адам көз жұмды. Қаза тапқандардың 25-і әскери қызметшілер көрінеді. Қанды қасап Асадтың әскерлері Сирияның солтүстігіндегі Банаш қаласына шабуыл жасаған кезде орын алған.
«Әл-Жазира» телеарнасының хабарларына қарағанда, президентке қарсылар өздерінің наразылықтарын көп жағдайда бейбіт демонстрациялар арқылы білдіруге ұмтылады екен. Ал билік болса, оппозицияны бейбіт тұрғындарға оқ атып жүрген қарулы бандаларды бүркемелеп отыр деп айыптайды. Сөйтіп, үстіміздегі жылдың наурыз айының соңында басталған билікке қарсы шерулер тоқталар емес.
ҮШ АЙДА 70 МИЛЛИОН ДОЛЛАР ЖИНАДЫ
АҚШ президенті Барак Обама мен Демократиялық партия шілде мен қыркүйек айлары ішінде президенттік сайлау науқаны үшін 70 миллион доллар жинап үлгерген. Мәселен, Обама штабы 42,8 миллион доллар тапса, Демократиялық партияның ұлттық комитеті 27,3 миллион доллар шоғырландырған.
Сәуір мен маусым айларын қоса есептегендегі сол аралықта жинақталған сома 86 миллион долларды құраған еді. Ал президенттікке Республикалық партиядан ықтимал кандидаттар айтарлықтай аз қаржы жинаған. Мысалы, Техас губернаторы Рик Перри сол мерзім ішінде бар болғаны 17 миллион доллардың ғана басын құрай алған.
САЙЛАУАЛДЫ БАҒДАРЛАМАСЫН ЖАРИЯЛАДЫ
Ресей Федерациясының коммунистік партиясы сайлауалды бағдарламасын жариялады. Оның толық мәтіні партияның сайтына орналастырылды. Коммунистер өздерінің бағдарламасында ел алдында тұрған 5 басты сынақты атап көрсетеді.
Олар: орасан әлеуметтік теңсіздік, демографиялық апат, экономиканың құлдырауы, қорғаныс қабілетінің жоғалуы және рухани-адамгершілік азғындау. Осыған байланысты коммунистер өз бағдарламасын мына жүйе бойынша құрып отыр. Олар: жаңа үш сыртқы саяси бағыт, бес әлеуметтік басымдық және жеті жаңа экономикалық саясат.
ҚЫСҚА ҚАЙЫРЫП АЙТҚАНДА:
Бағдадта екі жарылыс жасалды. Оның салдарынан кем дегенде 16 адам опат болған. Соңғы кездері Иракта лаңкестік әрекеттер жиілей түсті. Мәселен, үстіміздегі жылдың тамыз-қыркүйек айларында ғана ел аумағында 424 адам көз жұмды.
АҚШ грекиялық анархистерді дүние жүзіндегі қатерлі топтардың қатарына қосты. Өйткені, анархистер 2009 жылдан бері Грекия аумағындағы түрлі елдердің мемлекеттік мекемелерінде жарылыстар ұйымдастырып жүр.
Куба басшылығы АҚШ-пен тұтқындар алмасудан бас тартты. Америкалықтар АҚШ-та жансыздық жасағаны үшін сотталған кубалық Рене Гонсалесті Кубада 15 жылға түрмеге қамалған өз азаматы Алан Гроссқа айырбастамақ болған еді.
Ресейдің «Транснефть» компаниясы Қытайға көмірсутегі шикізатын жіберуді уақытша тоқтатты. Бұған Амур облысында орын алған жер сілкінісі себеп болды. Кейбір дерек көздеріне қарағанда, оның қуаты 5,6 балл мен 6,4 балл аралығын құраған.
Украинаның экс-президенті Леонид Кучманың бұрынғы күзетшісі, отставкадағы майор Николай Мельниченко АҚШ-қа қашып кеткен. Оның сөзіне қарағанда, ел билігі тарапынан қысым көрген секілді.
Интернет материалдары негізінде әзірленді.