Қазақстанның «Batyroff», «Yurframe», «Nagimuwaa», «ХаХа_Show» секілді белгілі вайнерлері 5 аталым бойынша алдын ала берілген тақырыптарда өз жұмыстарын (вайндарын) ұсынды. Фестивальдің ашылуына Астана қаласы әкімінің орынбасары Ермек Аманшаев қатысты.
«Біз «Astana Vine Fest 2017» вайнерлердің алғашқы фестивалі қызықты жастар жобалары ішінде өз орындарын алатынына сенгіміз келеді. Астана қаласы әкімдігінің атынан фестивальдің барлық қатысушыларына алғыс білдіремін. Бүгін біз үлкен креативті жұмыстардың куәгері болып, лайықты қатысушылар жеңімпаз атанады деп ойлаймын», - деді фестивальге қатысушылар мен қонақтарға Ермек Аманшаев.
Бірінші вайнерлер фестивалінің әртүрлі номинациялар бойынша жеңімпазы атанды: Т_Jokers - «Жылдың үздік ролигі», Meirzhan_Bas_Production - «Үздік ер рөлі», Nagimuwaa- «Үздік әйел рөлі», Azimakula - «Үздік эпизодтық рөл», Togy_Dell -«Халық таңдауы». Фестиваль жеңімпаздарына естелік сыйлықтар мен 300 мың теңге көлемінде фестиваль демеушілерінен ақшалай жүлделер табысталды.
«Біздің фестиваль мультипликативтік әсер береді деп ойлаймыз. Себебі еліміздің үздік вайнерлер мен блогерлерінің жалпы жазылушылар аудиториясы 10 млн адамнан асады. Негізінен оның басым бөлігі - жастар. Сондықтан біз маңызды «Рухани жаңғыру» бағдарламасын жастарға барыншы түсінікті етіп жеткізгіміз келді. Мақсатымыз - өскелең ұрпаққа мемлекет басшысының елімізде жүзеге асырып жатқан жаңа идеялары мен бастамаларын түсіндіру болды», - дейді Астана қаласының жастар саясаты мәселелері жөніндегі басқарма басшысы Асхат Оралов.
