Қырғызстаннан, Татарстан мен Башқұртстан Республикаларынан келген және қазақстандық бірнеше топ өнер көрсеткен сайыс жоғары деңгейде өтті. Бұрын «Жайдарманның» ішкі біріншілігіне қатысып, тәжірибе жинаған қырғызстандық жайдарманшы жастар ойынға тыңғылықты дайындықпен келіп, бас жүлдемен қоса 500 000 теңге ақшалай сыйлықты иемденді. І орын мен 350 000 теңгені қазылар алқасы бірауыздан Татарстан құрамасына берсе, ІІ орын алған Башқұртстаннан келген командаға 300 000 теңге ақшалай сыйлық бұйырды. Ал ІІІ орын мен 150 000 теңге екі командаға – Торғай өңірінің намысын қорғап келген «Ару.кз» тобы мен Оңтүстік Қазақстан облысының құрамасына берілді.
Сондай-ақ, Халықаралық Түркі академиясы жаркенттік ұйғыр жастарынан құралған «Lagman.com» тобы мен түркістандық өзбек ағайындардың құрамасы – «Яссы» тобына 250 000 теңге арнайы ақшалай сыйлық ұсынды.
«Жайдарман» арқылы қазақ тілінің сәнге айналуына зор үлес қосып жатырмыз. Мақсатымыз – осы ойындарды халықаралық деңгейге жеткізу. Бүгінгі ойын осы мақсаттың алғышарты деп ойлаймыз», – деді «Жайдарманның» жүргізушісі, Қазақстан КВН одағының төрағасы Есен Елеукен.
Төл рухани жобаның халықаралық деңгейге шыққанына жиналған жұртшылық шынайы ықылас танытты. Оны көрермен көпшіліктің ду қол шапалақтап, шараның соңына дейін қолпаштап отырғанынан да байқауға болады. Бұған қоса, «Жайдарман» түркітілдес елдердің жастарының өзара ынтымақтастығы мен рухани-мәдени байланыстарына кең өріс ашты. Алдағы уақытта ойынды «Қазақстан» ұлттық арнасынан көрсету жоспарланып отыр.
Әли БИТӨРЕ,
«Егемен Қазақстан»
