Оңтүстік адам ресурсына бай болғандықтан балабақша кезегінде елу мыңға дейін бүлдіршін бар еді. Электронды жүйенің артықшылығы – төбесімен көк тіреген дәудің баласы болса да кезектен аттап өте алмайды. Әр ата-ана толық ақпараттандырылған жүйеден бәрін көріп отырады.
Жиынға Білім және ғылым министрлігінің өкілі, облыстық мәслихат депутаттары мен басқарма басшылары, аудан, қала әкімдері, жалпы білім саласына қатысты құрылымдардың жетекшілері, барлығы 800-ден астам адам қатысқан.
Облыстық білім басқармасының басшысы Исатай Сағындықов саладағы жетістіктер мен алда атқарылатын жұмыстар жа-йын баяндады.
Атап айтқанда, биыл білім саласын қаржыландыруға облыстық бюджеттен 257,6 млрд теңге бөлініп, өткен жылмен салыстырғанда 19 млрд теңгеге артып отыр. Мұнан бөлек, осы жылы 31,2 млрд теңгеге 79 білім нысанының құрылысы жүргізіліп жатса, оның ішінде 29-ы жыл соңына дейін аяқталып, пайдалануға берілмек.
2016 жылы апатты және үш ауысымды 43 мектеп болған еді. Ағымдағы жылы 20 мектеп пайдалануға тапсырылады. Ал қалған 23 мектептің құрылысын 2018-2019 жылдары аяқтау жоспарланған. Мектепке дейінгі тәрбие мен білім беру мекемелері өткен оқу жылымен салыстырғанда 95 бірлікке артып, балабақшаға кезекке тұрған 3-6 жастағы балалар саны 43 мыңнан 28 мыңға азайды.
Мемлекеттік бағдарламаға сәйкес мектеп оқушылары тегін оқулықтармен қамтамасыз етілуде. Облыс бойынша осы оқулықтарға жалпы 4,5 млрд теңге бөлініп, өткен жылмен салыстырғанда 1,8 млрд теңгеге өсті.
Жиын барысында сөз алған облыс басшысы өңір педагогтарын жаңа оқу жылымен құттықтады.
Елбасы Нұрсұлтан Назарбаев «Табысты болудың ең іргелі, бас-ты факторы білім екенін әркім терең түсінуі керек. Жастарымыз басымдық беретін межелердің қатарында білім әрдайым бірінші орында тұруы шарт. Себебі, құндылықтар жүйесінде білімді бәрінен биік қоятын ұлт қана табысқа жетеді», деген болатын. Сондықтан да бүгінгі таңда білім беру мазмұнына, оқушы мен педагог тұлғасына және қызметіне деген көзқарастар түбегейлі өзгеріске бет бұрып отырған күрделі кезең, деді өңір басшысы.
Облыс әкімі саладағы кемшін түсіп жатқан мәселелерге де тоқталды. Күрделі мәселелерді шешудің жайттарын таразылады. Бұл күн кейбір ұстаздар үшін қоныс тойына ұласты.
Тамыз конференциясында білім саласында талай жылдардан бері үлгілі қызмет етіп келе жатқан өңірдегі үш ұстазға, атап айтқанда, Шымкент қаласының М.Жұмабаев атындағы №39 жалпы орта мектебінің бастауыш сынып мұғалімі Айнұр Дүйсебековаға, №66 Қазығұрт жалпы орта мектебінің информатика пәнінің мұғалімі Жанат Мұсаеваға және Түркістан қаласындағы №9 Некрасов атындағы гимназиясының қазақ тілі пәні мұғалімі Венера Батырқұловаға пәтер кілті табысталды. Сонымен қатар, Білім және ғылым министрлігінің наградалары аясында 5 мұғалім «Ы.Алтынсарин», 5 ұстаз «Білім беру ісінің құрметті қызметкері» төсбелгілерімен марапатталды.
Бүгінде өңірде орта мектепте 69 мыңнан аса мұғалім білім береді. Биылғы оқу жылында 640 мыңға жуық оқушы мектеп табалдырығын аттайды деп күтілуде.
Бақтияр ТАЙЖАН,
«Егемен Қазақстан»
Оңтүстік Қазақстан облысы
