Оқыту үрдісіне жаңа инновациялық технологияларды енгізумен ғана іс бітпейтіні белгілі. Тәрбиесіз берген білімнің зиянға шығатыны да ақиқат. Демек, заман ағымына ілесе отырып, қазақы кейіпті сақтап қалудың да маңызы зор. Қазақстан Республикасының Президенті Н. Назарбаевтың биылғы Қазақстан халқына арнаған «Қазақстанның үшінші жаңғыруы: жаһандық бәсекеге қабілеттілік» атты Жолдауы және «Рухани жаңғыру» бағдарламасына негізделген пленарлық мәжіліске облыс әкімі Амандық Баталов, Білім және ғылым министрлігі ғылым комитеті төрағасының орынбасары Еркін Садықов, басқарма басшылары, аудан, қала әкімдері, мектеп директорлары мен ұстаздар қатысты.
Кеңеске қатысушылар ең алдымен аталған шараға арнайы дайындалған білім саласының озық үлгілері мен оқытудың жаңа технологияларының көрмесін тамашалады. Жиынның модераторы облыс әкімінің орынбасары Жақсылық Омар жиынды салтанатты түрде ашқан соң, негізгі баяндаманы облыстық білім басқармасының басшысы Ләззат Базарқұлова жасады.
– Бүгінгі таңда адами капиталды дамыту, бәсекеге қабілетті ұрпақ тәрбиелеу, талапқа сай білім беру – мемлекетіміздің басты ұстанымдарының бірі. Қазақстанның үшінші жаңғыруы, әлемдік үрдістерге енуі білімнің жаңа сапалық деңгейінің маңыздылығын арттыруда. Себебі, сапалы білім – мемлекеттің жан-жақты дамуын анықтайтын көрсеткіш әрі экономикалық дамуының кепілі. Осы мақсатты іске асыруда облысымызда білім саласын қаржыландыру көлемі жылдан-жылға артып келеді. Апатты және үш ауысымды мектеп мәселелерінің оң шешімін табуы, білім беру нысандарына күрделі және ағымдағы жөндеу жұмыстарының жүргізілуі және материалдық-техникалық базаларының нығаюы балалардың сапалы білім алуына зор ықпалын тигізіп отыр, – деді облыстың бас мұғалімі.
Басқарма басшысы келтірген мәліметтерге сүйенсек, білім беру ұйымдарын ақпараттандыруға биыл 333 миллион 536 мың теңге бөлініп, оқушылардың IT-білімдерін қалыптастыруға күш салынып жатыр. Кең жолақты интернет желісіне мектептердің 84,7 пайызы қосылып, 83 пайызы интерактивті тақтамен, 52,3 пайызы лингафонды, 47,1 пайызы жаңа модификациялы кабинеттермен жабдықталған. Ауылдық жерлерде орналасқан мектептердің материалдық-техникалық базасын нығайтуға 823 000 миллион теңге жұмсалып, 410 шағын және орта мектептің мультимедиялық құрылғылармен жабдықталуы, сондай-ақ, шағын жинақталған мектептердің BilimLand электронды контенті орнатылған интерактивті құрылғылар жиынтығымен қамтамасыз етілген. Бұл қала мен ауыл мектептері арасындағы білім беру сапасының алшақтығын жоюға қосылған бір үлес деуге болады. Сонымен қатар, жергілікті атқарушы органдар мемлекет-жекеменшік әріптестігін дамыту бойынша атқарған жұмыстар нәтижесінде жекеменшік мектепке дейінгі ұйымдар санының үлесі соңғы екі жылда 12,9 пайызға артып, бүгінде 67,3 пайызды құрады.
Білім беру саласында педагогтардың кәсіби құзыреттілігін арттыру, жаңартылған білім мазмұнын енгізуге дайындық барысы, қазақ тілін латын әліпбиіне көшіру реформасын жүзеге асыру жұмыстары, ағылшын тілі пәні мұғалімдерінің кәсіптік білік пен тілді меңгеру деңгейін көтеру, білім беру жүйесін жоғары білікті кадрлармен қамтамасыз ету, жас мамандарды тұрақтандыру, биылғы Ұлттық бірыңғай тестілеудің нәтижесі, білім сапасын жетілдіруге қатысты реформалық өзгерістер жайын сөз қылған білім басқармасының басшысы бірқатар проблемаларды да алға тартты. Мәселен, инклюзивті білім беру жүйесін енгізуде қиындықтар бар. Облыстағы 8 коррекциялық кабинеттің (Текелі, Қапшағай қалалары мен Еңбекшіқазақ, Сарқан, Ескелді, Қарасай, Талғар аудандары) өз ғимараттары жоқ. Бөлінген ғимараттар нормативтік талапқа, санитарлық-эпидемиологиялық және өрт қауіпсіздігі нормаларына сай емес. Коррекциялық көмек алатын балалар арнайы құрал-жабдықтарды толығымен пайдалана алмайды. Ал, Панфилов, Жамбыл, Іле, Көксу, Райымбек аудандарында коррекциялық кабинеттер мүлде ашылмаған. Райымбек ауданында түзету кабинетінің болмауына байланысты балалар Еңбекшіқазақ ауданына баруға мәжбүр. Бұл ата-аналардың наразылығын тудыруда. Осыны алға тартқан сала басшысы коррекциялық кабинеттерде түзету, емдеу жұмыстарын тиісті деңгейде жүргізу үшін нормаға сәйкес келетін ғимарат бөліп немесе жаңа ғимарат құрылысын салу қажеттілігі туралы облыс әкімі алдына мәселе қойды. Сондай-ақ, дуалды оқытуды енгізу жүйесі республикалық көрсеткіштен төмен екендігі айтылып, аудан, қала әкімдеріне кәсіпкерлік палатасы, жұмыс берушілер ассоциациясымен бірігіп, бұл бағыттағы жұмыстарды жандандыруды ұсынды.
Білім және ғылым министрлігі Ғылым комитеті төрағасының орынбасары Еркін Садықов 2020 жылдан бастап 12 жылдық білім беру жүйесі толығымен енгізілетінін, соған орай нөлінші сыныпты бүлдіршіндер мектептегі даярлық сыныптарында немесе балабақшаларда оқитынын айтты. 1 қыркүйектен бастап жалпы білім беретін мектептерде пәнді ағылшын тілінде өткізетін мұғалімдердің жалақысына үстеме қосылатынын жеткізді.
Ал, жарыссөзге шыққан ұстаздар қауымы білім саласындағы өзекті мәселелерді талқылап, облыс басшысына өз ұсыныстарын білдірді. Ол ұсыныстар, негізінен, жаңа енгізіліп жатқан реформаларға орай мұғалімдердің біліктілігін арттыру орталықтары көптеп ашылса, ағылшын тілі курстары қолжетімді болса деген төңіректе болды.
Дәстүрлі жиынның жұмысын облыс әкімі Амандық Баталов қорытындылады.
– Елбасы Нұрсұлтан Әбішұлы Назарбаев айқындап берген елдік бағытымыз – «Рухани жаңғыру» бағдарламасы жаңа міндеттер жүктеді. Бұл тарихи құжаттағы міндеттерді іске асыруға ұстаздар қауымының қосар үлесі зор. Өңірімізде жаңа талаптарды орындап, білім сапасын арттыру бойынша тиісті шаралар қабылданды. Ауыз толтырып айтатын жетістіктеріміз мол. Жұмыс болғандықтан, кемшіліктер де болады, қойылған мақсаттарға жете алмаған бағыттар да бар. Бүгін соның барлығын сараптап, жаңа оқу жылында атқаратын бірқатар міндеттерді анықтаймыз, – деп сөз бастаған әкім кемшіліктер жайына тоқтала келіп, кеңесте аталған барлық ескертпелерді білім басқармасына аудандар мен қала әкімдерімен бірлесіп шешуді тапсырды.
Жиын соңы дәстүр бойынша білім саласындағы ерекше жетістігімен көзге түскен қызметкерлер марапатталып, «ҚР білім беру ісінің құрметті қызметкері», «Ы. Алтынсарин» төсбелгілері, облыс әкімінің құрмет грамотасы және алғыс хаттар табысталды.
Алмас НҮСІП,
«Егемен Қазақстан»
Алматы облысы
