Қазіргі таңда қазақ күресінен Қазақстан Ұлттық құрамасы елордада соңғы оқу-жаттығу жиынын өткізуде. Жиын қорытындысы бойынша «Әлем барысында» ел намысын қорғайтын балуандардың есімі белгілі болмақ. Жаттығу жиынында «Қазақстан барысы» турнирінің жеңімпаздары мен қатысушылары Айбек Нұғымаров, Мұхит Тұрсынов, Айбат Сейтен, Әділжан Ыстыбаев және тағы басқа есімдері белгілі балуандар бар. Ұлттық құраманың балуандары биыл жаңадан тағайындалған бас жаттықтырушы Ерлан Естектің қарамағында жаттығуда. Ал бұған дейінгі турнирлерге балуандарды Жеңіс Биткөзов жаттықтырған болатын. Айта кетейік, Ерлан Естектің өзі кезінде ұлттық құрама сапында «Қазақстан барысы», «Еуразия барысы» сынды ірі додаларда белдескен балуан.
балуандардың жаттығуына қатысып, бас бапкер және спортшылармен аз-кем тілдесудің сәті түсті. Бас жаттықтырушының айтуынша, ұлттық құрамадағы алғашқы оқу-жаттығу жиыны жоғары деңгейде өтіп жатыр екен. Балуандардың жаттығуына аздап өзгеріс енгізілген. «Алдағы «Әлем барысы» турниріне 22 тамыздан бастап күніне екі мезгіл жаттығу жасап жатырмыз. Құрамаға келгеніме екі ай болды. Балуандар қазір бұрынғы бапкерлеріміздің әдісі бойынша дайындалуда. Дегенмен, өзім де бір-екі жаңа әдіс қостым», дейді бас бапкер.
«Әлем барысына» қатысатын балуандардың тізімі нақты шықпағанымен, Ерлан Естек 2013 жылы «Қазақстан барысы» атанған Айбек Нұғымаров нағыз бабында екенін айтты, жаттығу кезінде жарақат алып қалмаса, алдағы дүбірлі додада ел намысын қорғайды деп отыр. «Қазіргі уақытта Айбектің бабы келісіп тұр. Жаттығуда өзін әлі де тың екенін, бәсекеге дайын екенін дәлелдеуде. Ал тағы бір үміт артып отырған балуанымыз Мұхит Тұрсыновтың бабы онша келіспей тұр. Өйткені, ол «Қазақстан барысынан» кейін белін жарақаттап алған болатын. Дегенмен, әлі алда уақыт бар. «Әлем барысына» дейін Мұхит бабына толық еніп қалар», деді ол.
Мұхит Тұрсыновтың өзі болса, қыркүйек айында өтетін додаға толықтай дайын екенін, ел абыройын асқақтатуға бар күшін салатынын жеткізді. «Күніне жатпай-тұрмай екі мезгіл жаттығамыз. Егер, бапкерлер құрамы мені таңдап, маған «Әлем барысында» белдесесің десе, ел намысын қорғауға әрқашан дайынмын», дейді ол сенімді түрде.
Ал Айбек Нұғымаров биыл жаңа бас бапкердің қарамағындағы жаттығудың ерекше өтуде екенін айтады. Сондай-ақ, биылғы оқу-жаттығу жиынына тұңғыш рет 30-ға жуық балуанның қатысып жатқанын тілге тиек етті. «Жаттығу кезінде балуандардың көп болғаны өте пайдалы. Бір салмақта он балуан болса, бір-бірімізбен күресіп, түрлі жаттығуларды жабыла істейміз. Ерлан Естек жас маман болған соң, жаттығуы да ерекше. Бұйырса, биылғы «Әлем барысында» топ жаруға толық мүмкіндігіміз бар», дейді 2013 жылғы «Қазақстан барысының» жеңімпазы.
Айта кетейік, биылғы «Әлем барысы» екінші рет ұйымдастырылады. Тұңғыш рет турнир 2014 жылы Павлодар қаласында өткен болатын.
Әли БИТӨРЕ,
«Егемен Қазақстан»
