Мұхтар Құл-Мұхаммед Өскемен қаласында кезекте тұрған азаматтар үшін салынып жатқан тұрғын үйдің құрылысымен танысты және «Даму» қоры арқылы қаржыландырылған «Силумин-Восток» кәсіпорнының еңбек ұжымымен кездесті. Сондай-ақ, партияның облыстық активімен де кездесіп, Елбасы айқындап берген басым бағыттарды жүзеге асырудың жолдарын талқылады.
Жалпы, Өскемен қаласындағы 19-шағын ауданда 2021 жылға дейін 144 тұрғын үй салу жоспарланып отыр. Соның нәтижесінде жалпы ауданы 876 мың шаршы метрді құрайтын 14327 пәтер халық игілігіне берілмек. Облыс орталығында мұндай ауқымдағы құрылыс жұмыстарын жүргізуге Елбасының бастамасымен қолға алынған жаңа мемлекеттік бағдарламаның арқасында мүмкіндік туып отыр. Аталған тұрғын үйлерге коммуникация жүргізу үшін тек «Нұрлы жол» бағдарламасы бойынша өңірге 9 млрд теңгеден астам қаражат бөлінген. Жаңа пәтерлердің халықтың әлеуметтік аз қамтылған бөлігіне, бюджетті мекемелердің қызметкерлеріне және мемлекеттік қызметкерлер мен әскерилерге берілетінін атап өткен жөн.
Мұхтар Құл-Мұхаммед Шығыс Қазақстан облысының әкімі Даниал Ахметовпен бірге аталған үйлердің құрылыс жұмыстарымен арнайы танысты. Болашақта бұл ауданда Өскемен қаласының сол жағалаудағы орталығын құру көзделіп отыр. Қазірдің өзінде мұнда тұрғын үйлерден бөлек, облыстық сот, прокуратура, қан орталығы, 1000 орындық орта мектеп, балабақша және дзюдо орталығының ғимараттары пайдалануға берілген. Өскемен қалалық әкімдігі құрылыс бөлімінің басшысы Бауыржан Құдияровтың айтуынша, келешекте бұл ауданда әкімдік ғимаратын, спорт кешенін, кинотеатр, студенттер қалашығын, қазақ драма театрын және қазіргі заманғы сауда орталығын салу жоспарланған.
Осы жұмыстардың барлығы Мемлекет басшысының өңірге жасап отырған ерекше қамқорлығының арқасы екенін айтқан Мұхтар Құл-Мұхаммед: «Елбасының «Нұрлы жол», «Нұрлы жер» бағдарламалары бойынша Шығыс Қазақстан облысына бүгіннің өзінде 150 млрд теңгеден астам қаражат бөлінді. Қазір біз тұрған жерде 144 тұрғын үй салынып, мыңдаған адам пәтерге ие болады. Мұндай кең көлемдегі тұрғын үй құрылысы Өскеменде ешқашан болған емес. Осының бәрі Елбасымыздың Шығыс Қазақстан халқына жасаған ерекше қамқорлығының көрінісі. Бұдан артық қандай қамқорлық болуы мүмкін?!» деді.
Соңғы жеті айда Шығыс Қазақстан облысында өндірілген өнеркәсіп өнімдерінің көлемі 845 млрд теңгеден асты. Үшінші жаңғыру бағдарламасы аясында қарқынды жұмыс істеп тұрған кәсіпорындардың қатарында «Силумин-Восток» ЖШС-де бар. Бұл жерде сорғы қондырғылары, құбыр желісіне арналған арматуралар және кез-келген жұмысқа қолдануға болатын электротехникалық бұйымдар дайындалады. Таяуда аталған өнеркәсіп орны «Даму» қоры арқылы 213,5 млн теңге көлемінде тиімді несие алған. Бұл қаржы жаңа қондырғылар сатып алуға жұмсалды. Мемлекет тарапынан жасалған осындай қолдаудың арқасында шығысқазақстандық кәсіпкерлер Орталық Азия мен Ресей нарығына шығуға мүмкіндік алып отыр. Ең бастысы, Өскеменде дайындалған технологиялық өнімдердің сапасы шетелдік бұйымдардан еш кем емес.
«Силумин-Восток» зауытының іргесі 1996 жылы қаланған. Алғашында мұнда бар болғаны 11 адам жұмыс істесе, бүгінде кәсіпорын 240 адамды тұрақты жұмыспен қамтып отыр. «Қазіргі таңда мемлекет қолдауының арқасында зауытымыз қарқынды жұмыс істеп тұр. Түрлі инженерлік жұмыстармен айналысатын біздің зауыт үшін мұндай қолдаулар таптырмайтын мүмкіндік. Соның арқасында бүгінде жобалау кезеңінен бастап кез-келген күрделі нысандарды салуға және ғимараттарды автоматтандыруға мүмкіндік алдық», дейді «Силумин-Восток» ЖШС-нің даму жөніндегі директоры Зоя Новолодская.
Мұхтар Құл-Мұхаммед «Силумин-Восток» зауыты президенттік бағдарламалардың жемісі екенін айтып:
«Елбасымыз тәуелсіздіктің алғашқы күндерінен бастап елімізде шағын және орта бизнестің дамуына барлық жағдайды жасап келеді. Жыл сайын осы салаға республикалық бюджеттен миллиардтаған қаржы бөлінуде. Бүгінде мемлекет-жекеменшік әріптестігі арқасында кәсіпкерлер де әр түрлі ірі жобаларға өз инвестицияларын сала бастады. Соның нәтижесінде тек қана Шығыс Қазақстан облысында 40-тан астам жаңа кәсіпорындар ашылып, онда түрлі салалар бойынша маманданған 6 мыңнан астам адам тұрақты жұмыспен қамтылған.
Бұл кәсіпорындардағы қондырғылар шағын және орта бизнес ел экономикасының 60-70 пайызын құрайтын Жапония, Корея сияқты ең дамыған елдерден әкелінген. Жұмыстың барлығы 4G деңгейіндегі супертехнологиялар арқылы жүргізіледі. Ең бастысы, елімізде сол заманауи технологиялардың тілін еркін меңгерген білікті мамандардың саны артты. Бүгінгідей үшінші жаңғырту жағдайында мұндай бастамалардың ел экономикасына тың серпін берері сөзсіз.
Жалпы, Мемлекет басшысының шағын және орта бизнеске жасап отырған ерекше қамқорлығы үш бірдей өзекті мәселенің оң шешілуіне ықпалын тигізеді. Олар: біріншіден, өңірлердің экономикасын әртараптандырады. Екіншіден, жаңа кәсіпорындар мен жұмыс орындары ашылады. Үшіншіден, ішкі және әлемдік нарықта сұранысқа ие, жоғары бәсекеге қабілетті, сапалы өнім өндіріледі», деді.
Сонымен қатар, сапар барысында Мұхтар Құл-Мұхаммед облыс орталығындағы этнографиялық кешенде Шығыс Қазақстан облысындағы Қазақстан халқы Ассамблеясының өкілдерімен де кездесті. Аталған кешенде елімізде тұратын түрлі этнос өкілдерінің 17 үй-жайы орналасқан. Кездесуде негізінен Елбасымыздың «Болашаққа бағдар: рухани жаңғыру» бағдарламалық мақаласындағы тың бастамалар жайы сөз болды.
Ал «Нұр Отан» партиясының облыстық активімен кездесуде Мұхтар Құл-Мұхаммед Елбасы, партия Төрағасы Н.Ә.Назарбаевтың барлық бастамасын әр шығысқазақстандыққа жеткізіп, түсіндірудің маңызы зор екеніне ерекше назар аударды. Соған орай нақты тапсырмалар беріп, осы жолда партияның әр қызметкері аянбай еңбек етуі керектігін атап өтті.
Азамат ҚАСЫМ,
«Егемен Қазақстан»
Шығыс Қазақстан облысы
