«Астана» футбол клубының алаңға шықпағанына төрт апта болыпты. Сол уақыт аралығында ала допты әбден сағынған болса керек, «Атыраумен» өткен матчта елорда клубы жеті бірдей гол соқты. Бұл жеңістің «Қайратпен» арадағы ұпай айырмашылығын сақтап қалғаны өз алдына, алдағы уақытта «Вильярреалмен» болатын Еуропа лигасының топтық кезеңіндегі жауапты ойын қарсаңындағы көңіл күйге де игі әсерін тигізері айдан анық. Еске салсақ, «Вильярреал» – «Астана» ойыны 14 қыркүйекте Испанияда өтеді.
Өз алаңында «Қайсарды» қабылдаған «Қайраттың» құрамына жарақатынан айыққан Андрей Аршавин қайта оралған болатын. Ресейлік сұрмерген 61-минутта ойыншы алмастырып шыққанына қарамастан, гол соғып көзге түсті. Бұл ойында «Қайсардың» алаң иелеріне лайықты қарсылық көрсеткенін айта кету керек. Бірақ шешуші сәттерге келгенде қызылордалық футболшыларға сәттілік пен шеберлік серік болмай жатты. Есесіне, алматылықтар өздеріне берілген мүмкіндіктерді ұтымды пайдаланып, толығымен іске жарата білді.
Қола жүлдеден үмітті «Ордабасының» ұпайы түгел. Шымкенттіктер бұл турда «Тараздан» 1:0 есебімен басым түсіп, өздерінің басты қарсыласы – «Тобылдан» он ұпайға ұзап кетті.
Турнир кестесінің төменгі жағындағы командалар да аламан мәреге жақындаған сайын жанын салып ойнауда. Бұған дейін көш соңында келе жатқан «Ақтөбе» өз алаңында «Шахтерді» 2:0 есебімен тізе бүктіріп, екі саты жоғарылады. Ал Оралда «Ақжайықтан» екі гол айырмашылығымен опық жеген «Оқжетпес» абырой әпермес ең соңғы орынға түсті.
Премьер-лиганың 26-турында мынадай нәтижелер тіркелді:
«Астана» – «Атырау» – 7:0 (3:0), Мужиков, 28 (1:0). Мужиков, 38 (2:0). Мұртазаев, 44 (3:0). Томасов, 60 (4:0). Граховац, 69 (5:0). Твумаси, 87 (6:0). Томасов, 89 (7:0). «Ақжайық» – «Оқжетпес» – 2:0 (2:0), Дудченко, 42 (1:0). Главина, 45+1 (2:0). «Ертіс» – «Тобыл» – 1:2 (0:1), Щеткин, 41 (0:1). Квеквескири, 72 – өз қақпасына (1:1). Кассай, 82 (1:2). «Қайрат» – «Қайсар» – 3:1 (2:1), Исаэл, 14 (1:0). Исламхан, 19 (2:0). Курьор, 40 (2:1). Аршавин, 90+2 (3:1). «Ақтөбе» – «Шахтер» – 2:0 (0:0), Валиуллин, 53 (1:0). Обрадович, 81 (2:0). «Ордабасы» – «Тараз» – 1:0 (1:0), Ковальчук, 41 (1:0).
Чемпионаттағы 27-тур ойындары 16-17 қыркүйек күндері өтеді:
16 қыркүйек: «Ертіс» – «Ақжайық», «Тобыл» – «Ордабасы», «Тараз» – «Қайрат», «Атырау» – «Ақтөбе», 17 қыркүйек: «Қайсар» – «Астана», «Шахтер» – «Оқжетпес».
Сұрмергендер:
1. Жерар Гоу («Қайрат», 1) – 17;
2. Жуниор Кабананга («Астана», 1) – 15;
3. Патрик Твумаси («Астана») – 10.
Қайрат ӘБІЛДА,
«Егемен Қазақстан»