20 Қыркүйек, 2017

Шоқан Уәлихановтың белбеуі «Алтын­емел» музейінде сақтаулы

979 рет
көрсетілді
1 мин
оқу үшін

Алматы облысына қарасты Шоқан Уәлихановтың «Алтын­емел» мемлекеттік мемориалды музейі қорында сақтаулы тұрған құнды бұйымның бірі – Шоқанның парша белбеуі. 

Шоқан Уәлихановтың белбеуі «Алтын­емел» музейінде сақтаулы

Бұл жәдігер жайлы аталмыш музей басшысы Сәуле Әбішеваның айтуына қарағанда, белбеу 1985 жылға дейін Алматыдағы Мемлекеттік Орталық музей қорында сақталып келген. Оған қалай келді, ол жағы беймәлім. 

Кейін ҚазКСР Мәдениет ми­нис­трінің нөмірі 63-ші бұй­ры­ғымен акт жасалып (Акт № 165) белбеу Мемлекеттік орта­лық му­­зей қорынан алынып, «Алтын­емел» мемлекеттік мемиорал­ды му­зейіне табысталған. 

Жәдігердің құжаттамасында бұл дүниені саяхатшы-ғалым 1858-1859 жылдары Қашғарияға барған сапарында буынып келген делінген. Белбеу өте сапалы, таза қытай жібе­гінен жасалған. Бұйымға бер жағы 150 жылдан астам уақыт өтсе де, сыны бұзылмай жақсы сақталған. Екі ұшына бірдей төгілген сәнді ша­шағы мен жиектей кестеленген өрнегінің бір жібі де сетінемепті. 

Бұл зат өткен шілде айының басында Астанада өткен Алматы облысы мәдени күндері кезінде елордадағы Қарулы Күштердің әскери-тарихи музейінде көрмеге қойылып, көпшілік назарына ұсынылған болатын. 

Бекен ҚАЙРАТҰЛЫ, 

Суретті түсірген Орынбай БАЛМҰРАТ, 
«Егемен Қазақстан»