Биыл корейлердің Қиыр Шығыстан Қазақстанға қоныс аударғанына 80 жыл толады. Оған қоса, Қазақстан Республикасы мен Корея Республикасының арасында дипломатиялық қатынастардың орнағанына 25 жыл толуына орай толымды шаралар легі басталды.
Достық үйінде басталған салтанатты тұсаукесерге еліміздегі корейлер ғана емес, өңірлердегі отандастарымыздың бетке ұстар өкілдері, әрісі Сеул мен Астанадан халық өте көп жиналды.
Бір жағынан Қазақстанды мекендейтін корей ұлтының ақсақалдары бұл айтулы датаны қасіретті 1937 жылды еске алу деп қабылдау керек пе, әлде мереке ретінде атап өткен жөн бе дегенді талқыға салған екен. Үлкендер жинала келе, осы елде өсіп-өркендедік, екінші Отанымызды таптық деп ұйғарып, үлкен ұйымшылдықпен екі күнге созылатын мерекелік шаралар легін жоғары деңгейде атап өтуге келісіпті.
Нәтижесі көз алдымызда. Осынау бастамаға Қазақстан халқы Ассамблеясы да мұрындық болып, ҚХА Төрағасының орынбасары – Хатшылық меңгерушісі Дархан Мыңбай бүкіл іс-шараның маңыздылығына тоқталды. Ол энциклопедияның авторлары толымды жұмыс істегенін айта келе, ширек ғасырға жуық жасалып жатқан энциклопедиялар бар екенін, бірақ қолға тиген «Қазақстан корейлері энциклопедиясы» сапалық, мазмұндық тұрғыда дараланатынын атады.
Айтулы шарада талайды толқытқан естеліктер айтылды. ҰҒА президенті академик Мұрат Жұрынов корей достары жайлы жан тебірентерлік жақсы естеліктерімен бөлісіп энциклопедия жобасының жетекшісі Иван Пак бастаған авторлар екі халықтың достығы жайлы сыр шертті. Тұсаукесерде Кореяның Алматыдағы Бас консулдығының бас консулы Чжон Сынг Мин бар болғаны үш жылда осындай сүбелі жинақтың жарық көруімен құттықтады.
Салтанатты жиын барысында депортациялаудың қиындықтарын бастан кешірген және Қазақстанның дамуына үлес қосқан ардагерлерге құрмет көрсетіліп, күннің екінші жартысында Республика сарайында мерекелік концерт өтті.
Айнаш ЕСАЛИ,
«Егемен Қазақстан»
АЛМАТЫ
