«Қазақ әдебиеті, Қазақстан тарихы және география пәндері негізінде әр өлкенің әдебиеті, тарихы, қайталанбас табиғаты мектепте оқытылып, оқушылардың білімі шыңдалып, бағалануы тиіс. Ал факультативтік сабақтар есебінен жүргізілетін танымдық экскурсиялар мен мұражайларға, тарихи ескерткіштерге саяхаттар теориялық білімді толықтыру үшін ғана қолданылуы керек», дейді «Нұр Отан» партиясының хатшысы Қаныбек Жұмашев. Әрине, ол тапсырманы орындауда, ең алдымен, тұрып жатқан мекеніндегі тарихи тұлғаларды зерттеп, олар туралы кітаптар жазып шығаруға, мұражай ашуға,т.б. шараларды өткізуге болады.
Осы орайда айта кететін жайт, жаңа оқу жылында Ақмола облысы, Қорғалжын елді мекеніндегі мектеп-гимназияда ұлы Мұхтар Әуезовтің талантты шәкірті «Жан тынысы» (2017), «Арман асуында» (2015) дейтін кітаптардың авторы Ермек Біжкенов атындағы қазақ тілі және қазақ әдебиеті дәрісханасы ашылған болатын.
Салтанатты ашылу рәсіміне Қорғалжын ауданының және аудандық білім бөлімінің басшылары, еңбек ардагерлері, ауыл қарттары, мұғалімдер, оқушылар және Л.Н.Гумилев атындағы Еуразия ұлттық университетінің бірқатар ғалымдары қатысты. Оқыту бөлмесі күрделі жөндеуден өтіп, оқу процесіне қажетті құралдармен жоғары деңгейде жабдықталған.
Ермек Біжкенов – Қорғалжынның дамуына көп үлес қосып, еңбегі сіңген қоғам қайраткері. Ол жасынан өте зерек, дарынды, талапты азамат болған. Мектепте үлгерімі өте жақсы болып, 4-5 сыныпты бір жылда бітіреді де, 16 жасында аяқтап шығады. Алматы қаласында С.М.Киров атындағы ҚазМУ-дің филология факультетіне түседі. Бұнда да үздік оқып, Сталин стипендиясының иегері, комсомол көшбасшысы атанады. Оқуын бітірісімен туған өңіріне оралып халыққа қызмет етеді. Аудан мектептерін алға тартып, директор қызметін де атқарды, кезінде партком хатшысы болды.
Ермек Балтабайұлы өте әділ, шыншыл, қазақ тілін, орыс тілін, араб тілін жетік меңгерген жан болған. Алайда өмірдің заңына қарсы тұра алмай, небары 51 жасында дүниеден озды. Осы және басқа мәліметтерді дәрісханаға қойылған құжаттардан білуге болады. Бұл кісінің өмірінің өзі – жас ұрпаққа терең сабақ.
Оқу жылы да басталып кетті. Жаңа дәрісханада бірінші сабақтар жүргізіліп жатыр. Қорғалжын ауылының өлкетану сабақтарының бастапқы қадамы оқушыларға білім алуда үлкен септігін тигізуде.
Бұл дәрісханада оқушылардың оқуға деген ынтасы мен қызығушылығы арта түсуі сөзсіз. Тарихи оқиғаға айналған іс-шара тек Қорғалжын мектеп-гимназиясын ғана емес, күллі Қорғалжын тұрғындарын қуанышқа бөледі.
Міне, осындай игі іс арқылы апа-ағаларымыздан үлгі алып, туған елге, туған жерге, Отанымызға деген патриоттық сезімді оята аламыз. Ел болып, жұрт болып бірге бірігіп жұмыс атқарсақ, алға қойған мақсаттар мен жоспарларды жүзеге асырып, дамыған 30 елдің қатарына қосылатынымызға сенеміз. Қазақстан – тұғыры биік, мақсаты анық, болашағы жарқын ел!
Баян ЖҮСІПОВА,
Қорғалжын орталық мектеп-гимназиясы директорының орынбасары
Ақмола облысы
