Брифингте Жамбыл облысында Елбасы Нұрсұлтан Назарбаевтың «Қазақстанның үшінші жаңғыруы: жаһандық бәсекеге қабілеттілік» Жолдауында айтылған міндеттерді жүзеге асыру жайы мен осы өңірдің әлеуметтік-экономикалық жағдайы сөз болды. К.Көкірекбаевтың айтуынша, облыс халқының күш-жігері Мемлекет басшысы жүктеген міндеттерді орындауға жұмылдырылып отыр.
Биылғы сегіз айдағы көрсеткіш бойынша облыс экономикасының барлық саласында оң серпін байқалған. Алғашқы жартыжылдықтағы жалпы өңірлік өнім 0,5 пайызға артып, 231 млрд теңгені құраса, инвестиция көлемі 0,9 пайызға өскен. Өнеркәсіп өнімдері көлемі 0,6 пайызға артып, 227 млрд теңгеге жеткен. «Елбасы Жамбыл облысына барған сапарында химия өнеркәсібінің әлеуетін арттырып, облыстағы индустриялық және инфрақұрылымдық дамуға жете көңіл бөлуді тапсырды. Индустрияландыру бағдарламасының арқасында облыста 158 млрд теңге көлеміндегі 53 жоба жүзеге асырылды. Соның нәтижесінде 7 мың жаңа жұмыс орны ашылды. Енді бағдарламаның екінші бесжылдығында 6 мың жұмыс орнын ашу көзделуде. Биыл 17,3 млрд теңгенің 13 жобасы іске асырылып жатыр. Бұл 1350 жаңа жұмыс орнын құруға мүмкіндік береді», дейді облыс әкімі.
Мемлекет басшысының агроөнеркәсіп кешенін экономиканың жаңа драйверіне айналдыру міндетін қойғаны белгілі. Осыған байланысты облыс ауыл шаруашылығы саласын дамытуға айрықша мән беріп отыр. Биыл 104,6 млрд теңгенің өнімі өндіріліп, оның көлемі 2,6 пайызға өскен. Ауылшаруашылық дақылдары алқабы ұлғайтылып, оның көлемі 630 мың гектарға жетіпті. Бұл – былтырғымен салыстырғанда 38,5 мың гектарға артық көрсеткіш.
Облыс әкімдігі қант қызылшасы, жүгері, мақсары, соя алқаптарын ұлғайтуды қолға алып отыр. Биыл қант қызылшасы алқабының өзі 9,5 мың гектарға жеткен. «Былтыр 5 мың гектар жерден 116 мың тонна қызылша жиналып, орташа өнімділігі 232 центнерді құраған еді. Биыл 180 мың тонна өнім жинап, одан 18 мың тонна қант шығаруды жоспарлап отырмыз. Осы мақсатқа жету үшін Меркі қант зауыты
1 млрд теңгеге қайта жаңғыртылды», дейді К.Көкірекбаев.
Сондай-ақ облыс әкімі өңірде мал басы көбейіп келе жатқанын айтты. Осыған сәйкес облыс етпен өзін-өзі қамтамасыз ету деңгейіне жетіп, енді мал өнімдерін экспортқа шығара бастапты. Ет өнімдерін қайта өңдейтін «Меркі ет», «Оңтүстік халал тағамдары» және «Әулие ата Феникс» құс фабрикасы сияқты кәсіпорындар іске қосылып, соның арқасында былтыр шет мемлекеттерге 451 тонна ет экспортталған. Енді бұл көрсеткішті 700 тоннаға жеткізу межесі тұр.
Жалпы, ауыл шаруашылығын дамыту мақсатында облысқа 15,8 млрд теңге, оның ішінде республикалық бюджеттен – 6,3 млрд және облыстық бюджеттен 9,5 млрд теңге бөлінген. «Ет кластерін одан әрі дамыту үшін Мойынқұм, Меркі аудандарында ресейлік «Агрофирма Түрікпен» және малайзиялық «Агростан Фермс» серіктестіктері әрқайсысы 3 мыңнан 5 мың басқа арналған ірі қара мал бордақылайтын кешендер соғуда», дейді облыс әкімі.
Облысқа барған сапарында Елбасы пайдаланылмай жатқан жерді мемлекетке қайтару мәселесін көтерген болатын. Осыған орай соңғы 5 жылда пайдаланылмай жатқан 553 мың гектар ауыл шаруашылығы жері анықталып, мемлекетке қайтарылған. Қазір бұл учаскелерді тиімді пайдалану қолға алынып, 295 мың гектар жер аграрлық салаға инвестиция тарту мақсатында әзірленіп қойыпты. Ал биылғы 8 айдың ішінде инвестициялық жобаларды іске асыру үшін барлығы 827 гектар жер бөлінген.
Облыстың әлеуметтік мәселесіне де тоқталған әкім жұмыссыздықты азайту мақсатында бірқатар шаралар қолға алынғанын жеткізді. Оның айтуынша, қазір облыста жұмыс істеуге қабілетті тұрғындардың 42 пайызы өзін-өзі жұмыспен қамтығандар.
Облыстың білім саласында құрылыс жүргізуге бюджеттен 6,2 млрд теңгеден астам қаржы бөлінген. Биыл 14 мектептің құрылысы жүргізілсе, оның 4-еуі жаңа оқу жылында пайдалануға берілген. 2010 жылы облыста тек екі жекеменшік балабақша жұмыс істесе, биыл оның саны 94-ке жеткен.
Соңғы бірнеше жылда Таразда екі жекеменшік кардиохирургиялық орталық ашылған. Олардың әрқайсысында жылына 1 мыңға жуық ота жасалады. Жеке кәсіпкерлер тартудың арқасында 2 млрд теңгеге «Атлетик» көпсалалы спорт кешені тұрғызылып, бұл қаржы жеке инвестиция есебінен тартылған.
Қымбат ТОҚТАМҰРАТ,
«Егемен Қазақстан»
