Бүгінде еліміздің экономикасы дамып, халқымыздың әлеуметтік жағдайы күннен-күнге көркейіп келеді. Өз кезегінде азаматтарымыздың өмір сапасы да жақсарып, тұрғындардың денсаулығы түзеліп, өмір сүру жасы ұлғаю үстінде. Бұл бүгінгі күні мемлекет тарапынан атқарылып жатқан, Елбасымыз Нұрсұлтан Назарбаевтың ерен еңбегі мен қамқорлығының арқасында қол жеткізген игі жетістіктеріміз болып табылады. Алдағы уақытта да атқарылар істің ауқымы кең екені даусыз. Соның бірі – ел тұрғындарын сапалы ауыз сумен қамтамасыз етуді жалғастыру.
Ауыз су мәселесі бұл Қазақстанның ғана емес, бүкіл әлемдік деңгейдегі мәселеге айналып отыр. Өйткені адам денсаулығы мен өмірінің сапасы осы ауыз суға тікелей байланысты. Сондықтан да мемлекетіміз бұл мәселеге үнемі зор жауапкершілікпен қарап, халықты ауыз сумен қамтуда көптеген шаруаларды атқарып келеді. Оның ішінде тиімді жасалған «Ақбұлақ» бағдарламасының маңызы зор. Дегенмен, осындай бағдарламалар аясында елді мекендерді ауыз сумен қамтамасыз ету жұмыстары кейбір жерлерде өз дәрежесінде атқарылмай қалып жатыр. Елге ауыз су жеткізіп беру мақсатында бюджеттен бөлінген қаражат құмға сіңген судай жоғалып кетуде.
Сондай жайттардың бірі Алматы облысы Ұйғыр ауданы Үлкен Дихан ауылында орын алып отыр. Бұл ауылдың бір топ тұрғындарынан осы жылдың маусым айында менің атыма хат келген болатын. Хатта Үлкен Дихан ауылын ауыз сумен қамту бойынша мемлекет тарапынан 3 жыл бұрын басталған құрылыс жұмыстарының аяқсыз қалғаны және 2016 жылдың қазан айында пайдалануға берілуі тиіс жобаның орындалмағаны баяндалыпты. Мен өз кезегінде бұл мәселені Қазақстан Республикасының Инвестициялар және даму министрлігінің алдына қойғанымда ол министрлік аталған құрылыс жұмыстары биылғы жылдың қыркүйек айына дейін аяқталады деп жауап берген болатын. Бірақ осы жылдың шілде-тамыз айларында Парламент Мәжілісі депутаттарының халықпен кездесуі аясында мен Алматы облысы тұрғындарымен жолығып, аталған Үлкен Дихан ауылына арнайы барып, жағдаймен толық таныстым. Аталған жоба құрылысы жартылай басталып, аяқсыз қалған күйінде жатқанын, ешқандай құрылыс жұмыстары жүргізілмей тұр-
ғанын көрдім. Ауылға құбыр тарту мақсатында қазылған каналдар ашық-шашық күйінде қалдырылған. Қазба жұмыстары барысында ауыл егінін сумен қамтамасыз етіп келген арықтар бұзылып, жауып тасталған. Нәтижесінде ондаған шаруа қожалықтары жерлерін игере алмай, кәсібін тастап кетіп жатыр. Яғни ауылға ауыз су келмеген, ал егін суы арықтары жарамсыз болып қалған. Ауылдың негізгі көшесінің бойы-
мен қазылған күйінде қалған каналдар тұрғындарға жол қатынасына ыңғайсыздық туындатып жатыр. Ол шұңқырларға тіпті, кейбір азаматтар құлап, ауыр жарақат алған жағдайлар болыпты. Құны 161,3 млн теңгені құрайтын аталған жобаға 131 млн теңгесі бөлініп қойғанмен жауапты «Шахстрой» деп аталатын мердігерлік компания міндетін атқармаған. Осы жағдай бүгінгі күнге дейін өзгеріссіз күйінде қалып отыр.
Осы мәселені мен депутаттық сауал жолдап, Премьер-Министр Б.Сағынтаевқа жеткіздім.
Шаймардан НҰРЫМОВ,
Мәжіліс депутаты
