Алғашқы ән жинақтарын шығарған соң өнерпаз өрендер «Егеменнің» редакциясына өздері келді. – Бізді тыңдармандарға көбірек танытқан ән – «Бақытты күндерім» еді. Алғашқы жинағымызды да солай атауды жөн көрдік. Ал Астанаға келгенімізге бес жыл. Елімізде неше түрлі атаумен аталған топтар көп. Біз өзімізді «Астана» тобы деп атауды жөн көрдік. Бұл елордаға деген құрметіміз, дейді Нартай. Ол жары екеуін өнер табыстырғанын айтты. Құралайдың тек әнші ғана емес, сазгер екенін, оның «Гүлдер», «Астана» атты әндерін белгілі әнші Гауһар Қаспақованың орындайтынын, сондай-ақ Таразда жүргенде Құралайдың облыстық деңгейде екі рет шығармашылық кеші өткенін баяндады. Өз кезегінде Құралай да Нартайдың әншіліктен бөлек сазгерлік қырынан хабардар етті. Нартайдың «Ана» атты әнін Әділ Исламхан орындаса, «Жаңбырда» әнін «Тарту» тобы орындайды. Сондай-ақ Нартай Жамбыл облыстық филармониясында еңбек етіп жүргенде көпшілікке термешілігімен танылған азамат екен. Бүгінде эстрадалық бағытта ән шырқап жүргенімен, екеуі де қазақтың қара домбырасының құдіретіне бас иеді. Екеуі де домбыра, гитар, сазсырнай, фортепьяно аспаптарында ойнай алады.
Нартай Алтай мен Құралай Қырықбаеваның қоржынында осы күнде жиырмадан астам ән бар. Бұл, әрине жарыққа шыққандары. Ал өңделмегендері одан көп. Олар тек заманауи әндерді ғана емес, ретро әндер мен дәстүрлі бағыттағы әндерді айтқанды да ұнатады. Әрине аздап әрлейді. Бұл тұрғыдан алғанда Б.Байқадамовтың «Су тасушы қыз», К.Дүйсекеевтің «Еркеледің сен», Ақан серінің «Ләйлім шырақ», «Балқадиша» әндерін репертуарларына енгізген. Өздері де ән жазатынын жоғарыда баяндадық. Сондай-ақ Құрмаш Махан, Бағдат Сәмединова, Олжас Отар сынды өнер иелерімен де шығармашылық байланыста.
Бүгінде Нартай елордадағы Оқушылар сарайының студиясында ән әрлеуші қызметін атқарса, Құралай №2 Өнер мектебінде домбырадан сабақ береді. Биылғы жоспарларында ән жинағын шығарудан бөлек, шығармашылық кештерін өткізу де бар екен.
