Брифинг барысында З.Балиева Қазақстанда Бала құқықтары жөніндегі Уәкіл институты құрылғаннан бері балалар мен жастардың құқықтарын қорғау саласында көптеген игі істер атқарылып, бірқатар әлеуметтік маңызды жобалар іске асырылғанын атап өтті.
«Соның бірі – Бала құқықтары жөніндегі уәкіл жанынан ашылған Қазақстан балалары мен жастарына арналған ұлттық сенім телефоны болатын. Бүгінгі жиында мұндай сенім телефоны тек балалар мен жастарға ғана емес, қазіргі қоғам өкілдерінің барлығына қажет екенін жеткізгіміз келеді. Біз бұл пікірімізді келіп түскен қоңыраулар көрсеткішінің нәтижесіне сәйкес айтып отырмыз», – деді З.Балиева.
Қазақстанда Сенім телефоны өткен жылдың қараша айынан бері қызмет атқара бастаған болатын. Бүгінгі күнге дейін жедел желіге 2 миллионға жуық қоңырау шалынған. Соның ішінде биылғы 8 айда 1 млн 376 мың қоңырау қабылданған болса, оның аясында
5 мың бала мен жастар өкілдеріне жедел көмек көрсетілген. Атап айтқанда, 1 737 өтініш бойынша психологиялық және заңгерлік көмек көрсетіліпті.
Тұтастай алғанда, сенім телефоны арқылы өтініш білдіргендердің басым бөлігі кәмелет жасқа толмаған жасөспірімдер. Мамандар ұсынған деректерге сүйенсек, жедел желі іске қосылғалы 103 суицид жағдайының жолы кесіліп, балаларға қатыгездік жасаудың 42 оқиғасына тоқтау салынған. Сонымен бірге, ересектер тарапынан сексуалдық зорлық-зомбылыққа ұшыраған 7 балаға психологиялық қолдау көрсетілген.
Жалпы, тәулік бойы қызмет көрсететін «111» телефоны арқылы ақпараттық кеңес, психологиялық және заңгерлік көмек алумен қатар, бала құқықтарының бұзылу фактілері туралы да шұғыл хабарлауға болады.
Тағы бір айта кетерлік жайт, «111» шұғыл қызметінің жетекшісі әрі ұйымдастырушысы Ысқақ Құлатайдың мәлімдеуінше, бастапқыда балаларды қандай да бір қауіп-қатерден қорғай отырып, оларға телефон арқылы қол ұшын созып, көмектесуге бағытталған бұл желіге хабарласушылардың басым бөлігі ересектер қауымы болғандықтан, консультациялық қызмет ауқымын мейлінше кеңейтуге тура келген. Сол себепті, желіде жауап беретін мамандардың саны көбейтіліп, сапасын барынша жақсарту мәселесі қарастырылып жатыр.
Нұрлыбек ДОСЫБАЙ,
«Егемен Қазақстан»
