Бұл көрмеге жыл сайынғы әдетімен Ресей, Қырғызстан, Тәжікстан, Түрікменстан және еліміздің 150-ден астам қолөнер шеберлері қатысты. Алматы – алма жәрмеңкесіне айналып жүре берген-ді. Апорттың әдемі иісі айналасына бұрқырап, тәбет шақыра түскендей болды. Жеңсік жемістің сәндік қолданбалы өнер шеберлерінің төл туындыларында, зергерлік заттарында, шағын гобелендерінде, киіз бен тері бұйымдарында өзгеше өрнегін тауып жүре бергені көзіңізге қуаныш ұялатады. Бұл жәрмеңкеде береке мен сәттілікті әкелетіндей елестейді екен. Айшықты қолтаңбалармен ұсынылатын кәдесыйлар тартымдылығымен өзіне ынтықтыра түсетінін қайтерсіз. Дәстүрге айналған жәрмеңке салтанаты сәндік сөмкелер, ұлттық нақыштағы зергерлік бұйымдар, түрлі ойыншықтар, текеметтер, қызылды-жасылды көрпелер, қолдан жасалған ою-өрнекке толы әспетті шығарылымдар тартымдылығымен көз арбайды. Жәрмеңкені ұйымдастырушылар осы арқылы ел ықыласын өзіне аударып алғандай көрінді.
Сапарбай ПАРМАНҚҰЛ,
«Егемен Қазақстан»
АЛМАТЫ
