Тарқата айтар болсақ, таяуда ҮЕҰ-ның қызметі туралы ақпараттың қолжетімділігін қамтамасыз ету мақсатында үкіметтік емес ұйымдардың деректер базасы құрылған-ды. Азаматтар ҮЕҰ дерекқоры арқылы осы ұйымдардың қызметіне қатысты қажетті ақпаратты ала алады. Сонымен қатар бұл дерекқордың көмегімен ҮЕҰ-лар бір-бірімен ақпарат алмасып, өзара байланыс орнататын болады. ҮЕҰ дерекқоры үкіметтік емес ұйымдардың қызметінің ашықтығын қамтамасыз ету және олардың жұмысымен халықты ақпараттандыру мақсатында, сондай-ақ мемлекеттік әлеуметтік келісімшарттарды орналастыру, гранттар беру және жүлделерді тағайындау шеңберінде қолдану үшін құрылған ақпараттық алаң болып табылады.
Қазіргі таңда ҮЕҰ дерекқорында қазақстандық және шетелдік 3 мыңдай ұйымның тәжірибелері туралы ақпарат көрсетілген. ҮЕҰ деректер базасындағы ақпараттар Дін істері және азаматтық қоғам министрлігінің Азаматтық қоғам істері комитетіне жыл сайын 31 наурызға дейін ұсынылуы тиіс.
Ақпараттар ҮЕҰ дерекқорының интернет-порталы арқылы (infonpo.kz) пошта арқылы немесе қағаз және электронды БАҚ арқылы ұсынылады.
Негізінде, ақпаратты интернет-портал арқылы беру жұмыс процесін жеңілдетеді, есепті толтырудың дұрыстығына ықпал етеді Айта кету керек, интернет-порталға ұйымның ХҚО-дан (халыққа қызмет көрсету орталықтары) алынған ЭСҚ (электронды цифрлы қолтаңба) кілті арқылы тіркелуге болады.
Дерекқорға ақпаратты ұсынбау, уақытында бермеу, сондай-ақ жалған немесе бұрыс ақпарат берген жағдайда әкімшілік жауапкершілікке тарту қарастырылған. Әкімшілік құқық бұзушылық туралы Кодекстің 489-1-бабына сәйкес, құқық бұзушылық орын алған жағдайда ескерту жасалады, ал қайталанатын болса, 25 АЕК мөлшерінде айыппұл салынады немесе заң бұзушылық жасаған ұйымның қызметі үш ай мерзімге тоқтатылады.
Естеріңізге сала кетейік, Қазақстанда бүгінде 19 680 үкіметтік емес ұйым тіркелген, оның 13 879-ы өз қызметін белсенді жүргізуде.
Жолдыбай БАЗАР,
«Егемен Қазақстан»
