Өзбекстанда ресми емес деректерде бір миллионнан астам этностық қазақтар тұрады делінеді. Ал өзбек халқының бес жүз мыңға жуығы Қазақстан жерін жайлап жатыр. Бар тұрмыстық жағдайы келіскен, өзбек тілінде мектептері, драма театры бар диаспора өкілдері осындай мемлекеттік қамқорлық үшін Елбасына үнемі рахметін айтып отырады.
Жақында Қазақстан халқы Ассамблеясы Оңтүстік Қазақстан облыстық филиалының ұйымдастыруымен Өзбекстанға жол тартқан «Достық керуені» оңтүстікке оралды.
– Бұл сапар Өзбекстан Республикасының президенті Шавкат Мирзиёевтің наурыз айында Қазақстанға жасаған ресми сапары кезінде Қазақстан халқы Ассамблеясы мен Өзбекстан интернационалды мәдени орталығының арасында түзілген ынтымақтастық туралы меморандум аясында ұйымдастырылып отыр. Меморандум екі ел арасындағы мәдени ықпалдастықты арттырып, Қазақстан халқы Ассамблеясы мен Өзбекстан интернационалды мәдени орталығының әріптестігін нығайтуды көздейді. Соның аясында этносаралық бірлікті қамтамасыз етіп отырған ұйымдардың қос елге этносаяхат ұйымдастыруына мүмкіндік беріп отыр. «Достық керуені» Оңтүстік Қазақстан облысы Қазақстан халқы Ассамблеясының ұйымдастыруымен Өзбекстанға екінші рет жол тартты. Достық ниеттегі өзбекстандық делегаттар да Оңтүстік Қазақстан облысының тарихи орындарына саяхаттар ұйымдастыруда, – дейді керуенді бастап барған облыс әкімі аппаратының «Қоғамдық келісім» КММ басшысы Ербол Байқонақов.
Құрамында облыстың зиялы қауымы, еңбек ардагерлері, этно-мәдени орталық төрағалары мен БАҚ өкілдері бар керуен Өзбекстанда көрші елдің тарихи-мәдени орындарын аралады. Сапар басын Ташкенттегі Төле би кесенесіндегі ұлы әруақтарға зиярат етуден бастаған азаматтар Самарқандағы әйгілі Регистан тарихи-сәулеттік кешенімен танысып, Шахи-Зинда тарихи кешенінде жерленген Өзбекстанның экс-президенті Ислам Каримовтің рухына Құран аяттарын бағыштады.
Бұхарадағы Бахауаддин Накшбанди мавзолейін аралап көрді.
– Өзбекстан жерінде қазақтың айтулы екі биі Төле би мен Әйтеке бидің әз денесі мәңгі демалып жатыр, – дейді Қазақстан халқы Ассамблеясы Оңтүстік Қазақстан облыстық филиалы төрағасының орынбасары Мұратәлі Қалмұратов. – Екі туысқан елдің тамыры бір алып бәйтеректен тарайтындығы Қадыр ақын айтқандай «тарихы қалың болса да оқулығы жұп-жұқа» өткен дәуірлерден белгілі. Сапар барысында өзбек ағайындардан түбі бір туысқанға деген жылуды айқын сезіндік. Олар Мемлекет басшысы Нұрсұлтан Назарбаевтың әлемде орны ерек қайраткер екендігін, дүние жүзінде бейбітшілікті сақтауда ерен еңбек етіп жүргенін сүйсінішпен айтады. Біз де өз кезегімізде бауырларымызға жақсы тілектер тіледік. Бір кездері Өзбекстанның алғашқы президенті Ислам Каримов «Қазақпен бірге жүрсең адаспайсың» деген ғибратты сөз айтып еді. Сол ізгі тілек екі ел арасын бұрынғыдан бетер жақындатып келеді.
«Достық керуені» осылайша жақсы ниетке қызмет етіп жатыр.
Бақтияр ТАЙЖАН,
«Егемен Қазақстан»
Оңтүстік Қазақстан облысы
