Таразда қоғамдық сананы дамыту мәселесі қаралды

Кеңес отырысын Қазақстан Республикасы Президентінің жанындағы «Қоғамдық келісім» Рес­публикалық мемлекеттік мекемесі директорының орынбасары Әзімхан Қойлыбаев жүргізіп отыр­ды. Сондай-ақ аталған іс-ша­раға өңірлік «Қоғамдық келі­сім» коммуналдық-мемле­кет­тік мекемесінің басшылары – Достық үйлерінің дирек­тор­лары, Қазақстан Халқы Ассам­блеясы, этномәдени бірлес­тік­тердің мүшелері және этноағарту кешендерінің оқытушылары қатысты. Жиында әуелі Жамбыл облысы әкімінің орынбасары Ерқанат Манжуов сөз сөйлеп, об­лыстық Қазақстан халқы ассам­блеясының және «Достық» үйінің бүгінгі таңда атқарып отырған жұмыстарына тоқталды. Елімізде бастау алған рухани жаңғыру негізінде де бірқатар нәтижелерге қол жеткізгенін атап өтті. 

Бұдан кейін Астана қаласынан келген «Өзбек этномәдени бір­лестігі» қоғамдық бірлестігінің төрағасы, «Діндерді зерттеу орталықтары» қауымдастығының сарапшысы Шерзод Пулатов «Рухани жаңғырудың факторы ретінде қазақстандық бірегейлікті нығайту» тақыбырында баяндама жасады. Өз сөзінде Шерзод Аббозұлы еліміздің бүгінгі таңда бірегейлік пен татулықты сақтап отырған бірден-бір мемлекет екенін атап өтіп, қазақстандық бірегейлікті нығайту жөнінде ойларын айтты. Сондай-ақ «Вынхуа» Жамбыл облыстық дүнген мәдени орталықтарының қауымдастығы» қоғамдық бірлестігінің президенті Руслан Исмазов жаңақазақстандық пат­рио­тизмді тәрбиелеудегі қоғам­дық ұйымдардың рөлі жөнінде ай­тып өтсе, Батыс Қазақстан облы­сы әкімі аппаратының «Қоғам­дық келісім» коммуналдық-мем­лекеттік мекемесі директорының орынбасары Жамал Ихсанова «Облыстық Қазақстан халқы ассам­блеясы қоғамдық келісім кеңесінің жұмыстарын ұйым­дас­тыру жөнінде» сөз сөйледі. Ал Алматы облысы әкімі аппа­ра­тының «Дом Дружбы – Қоғамдық келісім» коммуналдық-мемле­кеттік мекемесінің директоры Тәңірберген Қасымберкебаев қайырымдылық бойынша жұ­мыс­тардың негізгі бағыттары жөнінде әңгімелесе, Маңғыстау облысы әкімі аппаратының «Қоғамдық келісім» коммуналдық-мем­лекеттік мекемесінің директоры Аманкүл Жайылханова Қазақстан халқы Ассамблеясы медиация кабинеттерінің мемлекеттік органдар және азаматтық қоғам инс­титуттарымен өзара іс-қи­мы­лының тетіктері жөнінде ой бөлісті. 

Жалпы, бүгінде рухани жаң­ғыру негізінде жастармен жұмыс жүргізудегі инновациялық жобалар маңызды. Бұл жөнінде Солтүстік Қазақстан облысы әкімі аппаратының «Қоғамдық келісім» коммуналдық-мем­лекеттік мекемесінің директо­ры Әсемгүл Есқожа айтып берді. Сон­дай-ақ Ақмола облысы әкі­мі аппаратының «Қоғамдық келісім» коммуналдық-мем­ле­кеттік мекемесі директорының орынбасары Манат Исмағұлов, Жезқазған қаласы «Достық және мәдениет үйі» мекемесінің көркемдік жетекшісі Ғай­нияш Мергенова және Шы­ғыс Қазақстан облысы, Боро­ду­лиха ауданы Достық үйі ком­муналдық-мемлекеттік қазы­налық кәсіпорнының директоры Александра Шпилькина сөз сөйлеп, өз пікірлерін білдірді. Сонымен қатар отырыс барысында рухани жаңғырудың факторы ретінде қазақстандық бірегейлікті нығайту, жаңақазақстандық патриотизмді тәрбиелеудегі қоғам­дық ұйымдар рөлінің мәсе­лелері де талқыланды. Сон­дай-ақ Қазақстан халқы Ассам­блеясын, Достық үйлерін дамы­ту тұжырымдамасының екін­ші кезеңіне сәйкес, комму­налдық-мемлекеттік мекеме­лер мен Достық үйлері қызмет­кер­лерінің біліктіліктерін арттыру мәселесі де қаралды. Оты­рыс­та директорлар Алматы, Батыс Қазақстан және Жам­был облыстарының мысалын­да Достық үйлерінің жұмыс тәжірибесі, облыстық Қазақ­стан халқы Ассамблеясы «Қоғам­дық келісім» кеңесінің жұмыс­тарын ұйымдастыру, сондай-ақ Қазақстан халқы Ассамблеясы қызметінің жаңа бағыттары болып саналатын қайырымдылықты, медиацияны дамыту мәселелері бойынша да пікір алмасты.

 Отырыс шеңберінде тілдерді үйретудің инновациялық әдіс­теріне, баршаға арналған ме­диа­тивтік технология тақырыбына арналған «Біліктілікті көтеру жүйесі: дәстүрлер мен инновациялар», «Қазақстанның 100 жаңа тұлғасы», «Баршаға ар­налған медиативтік технология» тақырыптарында панельдік пі­кірсайыстар мен семинар-тренингтер де ұйымдастырылды.

Хамит ЕСАМАН,
«Егемен Қазақстан»

Жамбыл облысы