Салтанатты шарада сөз алған аудан әкімінің орынбасары Раджан Сейітқанов ауданда білім саласына айрықша көңіл бөлініп отырғанын атап өтті. Оның айтуынша, биыл ауданның білім саласына 4 миллиард теңгеге жуық қаржы бөлініп, 20 мектеп мультимедиялық құрал-жабдықтарға қол жеткізіпті. Мектепке баратын оқушылар саны да ұлғайып, биыл 7 мыңға жетіп жығылыпты. Өңірдегі мыңға тарта мұғалімнің 806-сы жоғары кәсіби білімге ие болса, 180-і жоғары санатты, 289-ы бірінші санатты ұстаздар екен. Осындай деректерді алға тартқан Р.Сейітқанов Уваров орта мектебінің директоры Лика Бозтаеваға, О.Бөкей атындағы қазақ орта мектебінің директоры Сәуле Досқалиеваға және Черемщанка орта мектебінің директоры Татьяна Коряковаға аудан әкімінің грамотасын салтанатты түрде табыс етті. Сонымен қатар бұл күні өзге де үздік мұғалімдерге аудан әкімінің грамотасы мен облыстық білім және ғылым қызметкерлері кәсіподағы ұйымының арнайы төсбелгілері тапсырылды.
Азамат ҚАСЫМ,
«Егемен Қазақстан»
Шығыс Қазақстан облысы,
Глубокое ауданы
Суреттерді түсірген автор
