Осы бесікті тербетіп, ақылын аямайтын, шәкіртін аялайтын ұстаздар десек жалған болмас. Күні кеше елорданың төрінде еңбегі еленген үздік ұстаздарды Білім және ғылым министрі Ерлан Сағадиев марапаттады.
Ұлтқа мақтаныш, ұжымға сыйлы болып, ұлағатты ұрпақ тәрбиелеуде талмай талпынып жүрген ұстаздар қауымын марапаттау рәсімінде министрдің өзі де ақтарыла сөйлеп, ағынан жарылды.
«Қай заманда болсын, ұстаздарға құрмет жоғары болған. Ұстазға құрмет көрсету – білімге құрмет көрсету. Жақсы ұстазға кезігіп, тәлім-тәрбие алған шәкірт өмір майданында мойымай күресіп, болашақ жолдарда бағытынан таймасы анық. Біз қазіргі уақытта жаңартылған білім мазмұнына кезең-кезеңмен көшудеміз. Бұл орайда мұғалімдердің атқарар рөлі орасан зор. Сондықтан сіздерге сарқылмас күш-жігер тілеймін», деді Ерлан Сағадиев.
Айта кететін тағы бір жайт, Білім және ғылым министрлігі ағымдағы жылғы 26 қыркүйек-4 қазан аралығында мұғалімнің қоғамдағы имиджін қалыптастыру, педагог мәртебесін арттыру, моралдық-материалдық ынталандыру мақсатында білім беру ұйымдарында, аудандық білім бөлімдерінде, облыстық білім басқармаларында түрлі шаралар ұйымдастырған. Соның нәтижесінде жыл сайынғы «Үздік педагог» республикалық конкурсы жеңімпаздары анықталған. Аталған конкурс 2012 жылдан бастап өткізіліп келе жатыр.
Еліміздің ең үздік педагогтерін анықтаған конкурсқа республикамыздың барлық өңірлерінен мектепке дейінгі және орта білім саласында қызмет етіп жүрген 112 ұстаз, сондай-ақ техникалық және кәсіптік білім саласының 44 инженерлік-педагогикалық маманы қатысқан. Ал кешегі салтанатты мерекеде 64 жеңімпазға «2017 жылдың үздік педагогі» төс белгісі, куәлік және 1000 АЕК мөлшерінде сыйақы табыс етілді.
Сонымен қатар білім саласының дамуына зор үлес қосқан еліміздің 20 ұстазы арнайы алғыс хаттармен марапатталды.
Рауан ҚАЙДАР,
«Егемен Қазақстан»
