Қазақстан жастар Конгресі кеңесінің төрайымы Дариға Назарбаева, Олимпиада жүлдегері Василий Левит, танымал тележүргізуші Сәнді Сұлтан құрметті қонақ ретінде қатысты.
Үш күнге созылған слет жұмысында жастарды толғандыратын сауалдар талқыға түсіп, түрлі тренингтер мен шеберлік-сабақтары, көше субмәдениеті фестивалі, түнгі алау жанындағы бейресми кездесу, облыс әкімі Нұрлан Ноғаевпен кездесу, пікірталас, «Жаңа дем» экологиялық акциясы сынды шаралар ұйымдастырылды.
Қазақстан жастар Конгресі 2002 жылы Елбасы бастамасымен ашылған. Бүгінге дейін «Жасыл ел» бірыңғай еңбек жастары ұйымы, «Жас Ұлан жасөспірімдер ұйымы, «Студенттер альянсы» сынды көптеген ұйымдар құрылды. Конгрестің атқарушы директоры Айдын Сәбитов: «Биыл әскери-патриоттық бағытты айрықша назарға алып отырмыз. «Жас қару» патриоттық ұйымы жұмысын бастады. Тағы бір жаңалық – дүниежүзілік банктің грантын жеңіп алдық. Ауыл жастарының бастамаларын қолдау мақсатында шаралар өтеді. Жалпы, еліміз бойынша 106 конгрестік ұйым бар», – деді.
Республиканың түкпір-түкпірінен Жайық жағасына жиналған жастар слет жұмысына белсенді қатысып, таным көкжиектерін кеңейтті. Қазақстан жастар Конгресі кеңесінің төрайымы Дариға Назарбаева мен Атырау облысының әкімі Нұрлан Ноғаев пленарлық мәжіліске қатысып, жастармен ашық диалог құрды. Есепті баяндамалардан бұрын емен-жарқын жүздесуге негізделген жиында жастар қол жеткізген жетістіктері мен толғандырып жүрген мәселелерін ашық айтты.
«Алдымызда нақты мақсат болуы керек, – деді Дариға Назарбаева. – Қазір жастардың жағдайларын жақсартатын мемлекеттік бағдарламалар бар. «Жұмыспен қамту-2020» Жол картасы», «Жастардың кадрлық резерві», «Дипломмен – ауылға!», «Жасыл ел», «Білім мен ғылымды дамыту», «Үш тілде білім беруді дамытудың бағдарламалары», «Серпін», «Мәңгілік Ел жастары – индустрияға», жастар корпусын дамытуға арналған дүниежүзілік грант жобалары жарқын болашаққа жетелейді. Ауыл жастарын оқытуға 7 млрд теңге бөлініп отыр. Жастарды алғашқы мамандыққа оқыту бағдарламасы бар. Мыңдаған жас азаматқа жол ашқан «Болашақ» бағдарламасын айрықша атауға болады. Мемлекет тарапынан қамқорлық пен қолдау жеткілікті дәрежеде. Олар қалай жүзеге асырылып жатыр, нәтижелері қандай? Конгресс осы сауалдарға жауап іздеп, бағдарламалардың тиімділігін, жетістігін бақылап отыруы тиіс. Бақылау болмаса, сұрақ болмаса, жұмыс жүрмейді. Биылғы жыл еліміз үшін оқиғаларға бай жыл болды. ЭКСПО-2017 халықаралық көрмесі әлем назарын бізге аударды. Көрме жұмысынан жастар тыс қалған жоқ. Қазақстанның түкпір-түкпірінен еріктілер жиналды. Туризмді дамытуға жастар атсалысулары керек. Туризм – әлемдегі ең серпінді дамып келе жатқан бизнес түрі. Өз жерімізді білеміз бе? Қасиетті жерлерге, тарихи мұрамызға қаншалықты қанықпыз? Осы сауалдар жауапсыз қалмауы тиіс».
Жастар саясатының дамуына, ел жастарының азаматтық белсенділігін арттыруға, жан-жақты қабілетін шыңдауға бағытталған шараларды ұйымдастыруға үлес қосып жүрген белсенді жастар Конгресс кеңесі төрағасының алғыс хаттарына ие болды.
Дариға Назарбаева Атырауға сапарында Ұлттық гвардияның №51051 әскери бөлімшесіне барып, «Батыс» өңірлік қолбасшылығында қорғаныс пен қауіпсіздік бойынша атқарылып жатқан жұмыстарымен танысты.
Бақытгүл БАБАШ,
«Егемен Қазақстан»
АТЫРАУ
