Таң ата қорадағы малын далаға шығармақ болған 8-сынып оқушысы Мəди Өтегенов түз тағысымен бетпе-бет келген. Тауық шулап, бір нәрседен үріккендей азан-қазан болған соң жүгіріп барған Мәди аузы-басы қан-қан «үлкен сұр итке» тап болыпты. Жерден кесек алып, ұрмақшы болғанда түз тағысы қарсы секірген. Абырой болғанда жасөспірім жалма-жан қораның төбесіне шығып кетіпті. Оң аяғынан тістеген бөрінің аузын екінші аяғымен теуіп үлгерген.
Мәдидің айғайлаған дауысын естіген үлкендер көмекке келіп, Жанболат есімді көршісі шақырылмаған қонақты мылтықпен атып тастаған.
Әрине, Мəдиге ауылдық фельдшерлік пунктте алғашқы жәрдем көрсетіліп, шұғыл түрде Жалпақтал ауруханасына жеткізілді. Аурухананың бас дəрігері Алмас Тоғайбайұлының айтуынша, Мәдиге құтыруға қарсы вакцина жасалған.
– Қазір бала хирургиялық бөлімде бақылауда. Жарасы таза, ауырсыну белгілері жоқ. Ал ауылға беймезгіл келіп, елді әбігерге салған қасқырдың миы ветзертханаға жіберілді, – дейді бізге қазталовтық әріптесіміз Тұрарбек Қайырғали.
Қазбек ҚҰТТЫМҰРАТҰЛЫ,
«Егемен Қазақстан»
Батыс Қазақстан облысы
