Ол 1970 жылы Х.Абовян атындағы Армения мемлекеттік университетінің филолог-шығыстанушы мамандығы бөлімін бітіреді. 1970-1990 жылдары аралығында жоғары оқу орнындағы ғылыми ізденістері мен ұстаздық қызметтері сабақтасқан ғылыми-педагогикалық еңбек өтілі кезеңдері оның Кавказ жеріндегі ғұмыр жолының мәңгі ұмытылмайтын тағылымын қалыптастырды.
Шығыс филологиясы бойынша жазған алғашқы зерттеулерімен-ақ жұртшылықтың жылы ықыласын иеленген жас ғалым белгілі сыншы, әлем халықтары туындылары бойынша білікті аудармашы ретінде кеңінен танымал бола бастайды. Соның нәтижесінде «Эдеби Эрменистан» («Әдеби Армения») альманахының бас редакторы болып қызмет етеді. Сонымен бірге Армения Жазушылар одағы басқармасының мүшесі және Әзербайжан әдебиеті секциясын басқарады. 1985 жылы КСРО Жазушылар одағының мүшелігіне қабылданып, одақ көлеміндегі әдеби үдеріс шығармашылық дамуы желісінде танымал болды.
Абай атындағы Қазақ ұлттық педагогикалық университетіндегі алғашқы еңбек жолдары Қазақстандағы тұңғыш жоғары оқу орнының байырғы Қазақ әдебиеті кафедрасындағы профессорлық қызметімен басталды. Осы жоғары оқу орнындағы Қазақ филологиясы факультетінің ашылуы да, оның құрамындағы «Шығыс филологиясы» кафедрасының қалыптасуы мен дамуында білімді, білікті ұстаз-ғалым Князь Ибрагимұлының болғаны да халықтың жылы ықыласпен бағалауымен жаңа тарихымыздың жарқын беттері болып жазылды. Себебі Князь Ибрагимұлының ұйымдастыруымен, университеттің сол кездегі талантты қайраткер басшысы, академик Тоқтар Сәлменұлы Садықовтың қолдауымен «Қазақ тілі және әзербайжан тілі» мамандығы да уақыт талабына сай мамандар дайындаудың дәстүрін қалыптастырды.
Жоғары оқу орнында 1990-жылдардан бері еңбек етіп келе жатқан Князь Ибрагимұлы қазақ тілінің мемлекеттік мәртебеде қолданылуының нығаюында өзінің жеке басының өнегесімен және қарауындағы әріптестеріне ықпал етуімен туысқан халықтар өкілдеріне үлгі-өнеге болып келеді. Яғни, ол қазақ тілінде еркін сөйлеп, мемлекет құрушы қазақ халқы ұрпақтарының алдында нағыз гуманист ғалым-ұстаз екендігін дәлелдеп отыр.
Профессор К.Мирзоев Абай атындағы Қазақ ұлттық педагогикалық университетінің базасында ұйымдастырылған «Әлем тілдері орталығын» басқарған жылдары көптеген игі шараларды жүзеге асырды – интеграцияланған білім беру бағдарламаларын, мамандықтарға қажетті инновациялық технологияларға негізделген оқулықтар мен оқу-әдістемелік құралдарын дайындау, оқу-әдістемелік, ғылыми-теориялық және тәжірибелік анықтамалық әдебиеттердің электронды базаларын құру, оқу үдерісіне көптілді білім беру қағидаттарына негізделген инновациялық технологияларды енгізу, т.б.
Қазақстанның көрнекті ғалымдарының қатарында қажырлы еңбек етіп келе жатқан ғалым қазақ әдебиеті және қазақ тілі, сонымен бірге еліміздегі туысқан халықтардың әдебиеті мен мәдениеті мәселелеріне де арналған еңбектер жазып келеді. Мысалы, «Абай поэзиясы: Жүрегімнің түбіне терең бойла», «Қазақстан халықтарының әдебиеті», «Қазақстан халқының қазіргі заманғы әдебиеті», «Тілдік компоративистика аясында Қазақстанның шетелдік Шығыс елдерімен тарихи-мәдени байланысы», «Танылған мемлекеттің сенімді тірегі», «Тәуелсіздік жылдарындағы Қазақстан халқының көпұлтты әдебиеті» және басқаларды айтуға болады. Ғалымның әлем әдебиетінің көрнекті шығармаларын күрд тіліне аударғаны да оның шығармашылығындағы маңызды ерекшелікті танытады. Сондай-ақ ол қазақ әдебиетінің классиктері хакім Абайдың, Мұхтар Әуезовтің, Олжас Сүлейменовтің, Нұрлан Оразалиннің, Фариза Оңғарсынованың, т.б. да ақын-жазушылардың шығармаларын күрд тіліне аударған.
Ол Абай атындағы Қазақ ұлттық педагогикалық университетінің жанындағы кандидаттық, докторлық диссертациялар қорғалатын кеңестің тұрақты мүшесі ретінде жас ғылыми мамандарды дайындау ісіне де мол үлес қосуда. Оның жетекшілігімен 10-нан астам кандидаттық, кеңесшілігімен бірнеше докторлық диссертациялар қорғалды. Ғылыми-зерттеу жұмыстарының кең ауқымдылығы аясында оның Шығыс халықтарының классикалық әдеби мұраларын зерттеудегі біліктілігі алыс-жақын шетелдерге де мәлім. Салыстырмалы әдебиеттану (компоративистика) ғылымының жаңашылдық бағыттары бойынша ғалымның зерттеуі қазіргі жаңа ізденістерімен жалғасып отыр. Қазіргі кезде 500-ге жуық ғылыми еңбектері оның ішінде 20 монографиясы ғалымның әлемдік деңгейдегі ғылыми шығармашылық тұлғасын даралап тұр.
Қайраткер-ғалым К.Мирзоев Қазақстан халқы Ассамблеясын құруға да белсене атсалысып, Елбасы Н.Ә.Назарбаевтың елішілік және халықаралық байланыстардағы саясатының жүзеге асуына мол үлес қосып келеді. Еліміздегі әлеуметтік-экономикалық реформалардың, инновациялық технологиялардың жемісті нәтижелерге жетуіне Ассамблея мүшесі ретінде өзіндік көзқарастарын отандық және шетелдік бұқаралық ақпарат құралдарында үнемі жариялап жүр. Оның әлем халықтарының тілдерінде 100-ге жуық әлеуметтік-танымдық мақалаларының, ғылыми-зерттеу еңбектерінің жарық көруі Қазақстан Республикасының өркениет кеңістігіндегі беделін нығайту қызметін танытып отыр. Ол 2013 жылы кезекті сессиясында Қазақстан халқы Ассамблеясы Төрағасының орынбасары болып сайланды. Ал 2014 жылы Қазақстан Республикасы Президенті Н.Ә.Назарбаевтың Жарлығымен Қазақстан халқы қауымдастығын ұйымдастыру және өткізу жөніндегі Мемлекеттік комиссияның мүшесі болып тағайындалды.
Ғұмырнамалық өмір белестерінің ширек ғасырдан асқан кезеңінде Қазақстан Республикасының азаматы болып келе жатқан Князь Ибрагимұлы Мирзоевтың ғылыми, әдеби-шығармашылық және ұстаздық-тәлімгерлік басшылық қызметтерді атқаруы мемлекет басшылығы тарапынан үнемі лайықты бағаланып келеді. Оған 1998 жылы ғылыми-зерттеулеріндегі, білім беру мен мәдениет құндылықтарын дамытудағы жетістіктері мен белсенді қоғамдық-әлеуметтік қызметі үшін мемлекетіміздің жоғары марапаты – «Құрмет» ордені берілді. Сонымен қатар Қазақстан Республикасының Тәуелсіздік жылдарындағы алған марапаттауларының бәрі де қайраткер-ғалымның еңбегіне берілген лайықты бағалар.
Ғалым К.Мирзоев үлгілі отбасы иесі. Зайыбы Гогарчин Тааровна екеуі бес перзент өсіріп, олардың қоғамдық ортада өз орындарын табуына мүмкіндік жасады. Тұңғыш қызы Теймине – акушер-гинеколог, медицина ғылымдарының кандидаты, одан кейінгі қызы Медина – халықаралық заң кеңесшісі, ұлы Везир – заң ғылымдарының кандидаты, прокуратура органының қызметкері. Одан кейінгі ұлдары Назир – кәсіпкер, Саладин – «АлматыИнжСтрой» халықаралық компаниясының заң кеңесшісі. Әртүрлі тағдырлы жолдарымен келген әлем халықтарына жайлы қоныс, ақырында өздеріне мәңгілік бақыт мекені болған Ұлы Дала елі – Қазақ елі осылайша күрд халқының сөз арқауындағы перзенттерінің де сүйікті Отаны болып отыр.
Темірхан ТЕБЕГЕНОВ,
филология ғылымдарының докторы, профессор
