Қарағанды облысындағы Нұра ауданының жолдары Астанамызды азық-түлікпен қамтамасыз етуге тікелей қатысы бар инфрақұрылым болып табылады. Ал осы Астана – Қабанбай батыр – Киевка бағытындағы республикалық маңызы бар жол жөндеуді талап етіп отыр. Бұл бағытта басталған игі істер өз жалғасын тауып, ойдағыдай аяқталса деген ниеттемін.
Сонымен, жолдың жалпы ұзындығы – 100 шақырым болса, оның ішінде Астана – 16, Ақмола облысы бойынша – 35 (16-51 км) және Қарағанды облысы бойынша 49 шақырымды (51-100 км) құрайды. ІІІ жол категориясына жатады. Орташа алғанда тәулігіне 3012 көлік жүріп өтеді.
Астана қаласы бойынша 2010 жылдан 7 шақырым (9-16 км) учаскесі реконструкцияланудан өткеннен кейін І техникалық категорияға ауыстырылатын болады. Биылғы жылдың соңына дейін толық аяқтау көзделіп отыр.
Ақмола облысы бойынша 2010 жылы жалпы құны 1 746 млн. теңге құраған Қарағанды облысының шекарасынан Қабанбай батыр кентіне дейінгі 16 шақырым (35-51 км) тас жол күрделі жөндеуден өтіп, пайдалануға берілген. Сонымен қатар, Қабанбай батыр кентінен Қосшы кентіне дейінгі 18 шақырымының (16-35 км) құны 2 630,7 млн. теңге болса, осы учаске қазіргі таңда күрделі жөндеуден өтіп жатыр. Үстіміздегі жылдың аяғына дейін жолдың құны 585,3 млн. теңге тұратын 4 шақырымын игеру міндеті қойылып отыр. Жалпы, жұмыстың 2012 жылы аяқталуына 1 928 млн. теңге бөлу көзделген. Ал Қарағанды облысы бойынша құны 1 605 млн. теңге құраған 10 шақырымы (51-53 км, 74-77 км, 85-90 км учаскелері) күрделі жөндеуден өткен.
Ендігі кезекте ұзындығы 21 шақырым болатын (53-74 км) жолды күрделі жөндеуден өткізу мақсатында оның жобалық-сметалық құжатын жасау жоспарлануда. Үкімет осы 21 шақырымды жөндеу жұмыстарын алдағы жылға жоспарлап, оның аяқталуын қамтамасыз етуі керек. Өйткені, бұл жол бір жағынан Астана – Қарағанды бағытындағы жолға балама болып, оның жүктемесін жеңілдете түсер еді.
Дауылбай ҚҰСАЙЫНОВ, Мәжіліс депутаты.