Парламент Мәжілісінде «Тәуелсіз Қазақстан – менің Отаным» атты республикалық жастар форумы жалғасын тапты. Қазақстан халқы Ассамблеясынан сайланған Мәжіліс депутаты, Заңнама және сот-құқықтық реформа комитетінің мүшесі Людмила Хочиева жетекшілік еткен басқосу Қазақстан Республикасының 20 жылдық мерейтойы қарсаңында жастардың қазақстандық патриотизм, ұлтаралық татулық пен бірлік, ел болашағы тақырыптарын ортаға салып, талқылауға арналды.
Форум Көкшетау жерінен «Қазақстандық қоғамды біріктіру: жастардың көзқарасы» деп аталатын семинар-тренингпен басталды. Жастар Ақмола облысының жоғары оқу орындарында – Көкшетау мемлекеттік университеті мен «Көкше» академиясында оқитын замандастарымен жүздесті. Пікірлесіп, ой бөлісіп, бір шаңырақ астында «Baursak Party» шарасының тұсаукесерін өткізді.
Астанаға оралған жастар форум жұмысын «Отан-Ана» монументіне гүл шоғын қою салтанатынан бастап, басқосып естелік суретке түсті. Форум жастарды Тәуелсіздігімізді қастерлеуге, отансүйгіштікке, патриотизмге тәрбиелеу, жастарды толғандыратын өзекті мәселелерді Парламент қабырғасында қарастырып, көшбасшы жас ұрпақтың басын біріктіру мәселесін мақсат етті. Басқосуды «Бай-барыс» интеллектуалдық клубының мүшесі Әлкей Марғұланұлы жүргізіп отырды.
Жастар форумын палатаның Әлеуметтік-мәдени даму комитетінің хатшысы Бекен Әлімжанов құттықтады. «Бұл жастар – біздің мемлекетіміздің болашағы, елімізге ие болатын, оның экономикалық және ішкі-сыртқы саясатын жүзеге асыратын, Отанымыздың мәселелерін дүниежүзілік және халықаралық деңгейде шешетін Қазақстан Республикасының жастары.
Сондықтан, қазіргі таңда біздің алдымызда күрделі мәселелердің бірі болып осы жастарға өздерінің жігерлерін бұдан әрі дамыту үшін, алған білімдерін іске асыру үшін, мемлекетімізге өз үлестерін қосу үшін тиісті жағдай жасау мәселесі тұр. «Қазақстан жастары» атты бағдарлама қабылдадық. Талантты жастарды ынталандыру мен шығармашылық жобаларды қолдау үшін «Дарын» сыйлығын 10 аталым бойынша тағайындадық. Жастар саясаты туралы кейбір заңнамалық актілер, соның ішінде «Мемлекеттік жастар саясаты туралы» заң Мәжілісте қаралатын болады. Олар 5-10 жылдан кейін бәсекеге қабілетті, Батыс пен Шығыстағы өз замандастарынан қалыспайтын болулары керек. Сол үшін бюджеттен 2 миллиард теңге көлемінде қосымша қаржы қарастырылып жатыр», – деді депутат.
Жастардың жетекшісі, Мәжілістің Заңнама және сот-құқықтық реформа комитетінің мүшесі Людмила Хочиева үш күнгі жұмыс барысына тоқтала келіп былай деді: «Жастар дегеніміз кімдер? Олар – біздің мемлекетіміздің іргетасы. Үш күнгі республикалық жастар форумына қатысушылар еліміздің ең жоғарғы заң шығарушы органының қабырғасында отырып, әрқайсысының ел келешегіне жауапкершілік сезінгенін сұрар едім. Қазақстанның болашағын жасайтын бүгінгі жастар. Енді әрқайсыларыңыз алдарыңызда тұрған жүрекшені жағыңыздар. Сіздердің жүректеріңіз ел дегенде, Қазақстан дегенде осылай жанып тұрса екен деп тілеймін. Отанымыз бен халқымызға сол жанған жүрекпен қызмет етіңіздер».
Депутат осылай дей келіп, осы форумның мемлекетіміздің іргетасының бір кірпіші болып қаланатынына өзінің сенімін білдірді және жастарға ізгі тілегін айтып, «Ақ ниетпен» деген айшықты жазуы бар альбом ұсынды. Оған форумға қатысушылар тілектері мен ұсыныстарын жазады. Альбом Елбасы – Қазақстан Республикасының Президенті Нұрсұлтан Назарбаевқа жолданатын болады. Келесі құттықтауды «Жас Отан» жастар қанатының атқарушы хатшысы Нұрлан Өтешов жолдады.
* * *
Республикалық жастар форумы Парламент Мәжілісінің қолдауымен «Бай-барыс» интеллектуалдық клубын ұйымдастырып, шараға Парламент депутаттары, үкіметтік емес ұйымдардың өкілдері және «Жас Отан» жастар қанатының мүшелері, Студенттер альянсының жастары мен жоғары оқу орындарының студенттері қатысты. Форумды қорытындылаған жастар «Бәйтерек» монументін тамашалап, «Сүйікті елім, ардақты Қазақстаным» атты флеш-моб тәсілімен Астана көгіне шарлар ұшырды.
Сәуле ДОСЖАНОВА, журналист.