Семинар-тренингті «Қоғамдық келісім» РММ қызметінің жетекшісі Жанна Шаймұханбетова кіріспе сөзбен ашып, тілдерді қысқа мерзімде оқытудың оңтайлы әдіс-тәсілдерін айқындау, Қазақстан халқы бірлігінің маңызды факторы ретінде мемлекеттік тілдің рөлін арттыру, қазақстандық бірегейлікті қалыптастыру жолдарына тоқталды. Ол сонымен қатар латын әліпбиіне ауысу мәселесі жалпыхалықтық талқылауларға ұласып, құнды ой-пікірлер айтылып жатқанын, уақыт талабымен үндес нақты шешім қабылдау аса маңызды екенін атап өтті.
Тілдерді дамыту басқармасының басшысы Кемел Оспанов рухани құндылықтар тілімізді жаңғырту үдерісінде шешуші буын саналатынын, ал латын әліпбиіне ауысу ел, жастар болашағы үшін жасалатын құнды қадамдар болып табылатынын жеткізді. №17 ұлттық өркендеу орта мектеп-кешенінің директоры Ләззат Жалмұқанова жинақталған іс-тәжірибелер жайлы әңгімелесе, «Мың бала» республикалық мәдени-ағартушылық жобасының жеңімпазы Галина Жукова қазақ тілін меңгеруді, үйренуді балабақша мен мектептен бастаудың тиімділігіне жиналғандардың назарын аударды. Жазушы Қанат Тасыбеков жағдаяттық қазақ тілі әдістемесінің негізінде оқыту туралы ой бөлісті.
Тренингте Ы.Алтынсарин атындағы Ұлттық білім академиясы Орта білім институтының директоры Алдаш Рақымжанов «Мемлекеттік тілді оқытудың тиімді әдіс-тәсілдері», Ұлттық тілдерді оқыту орталығының жетекшісі Айжан Сұңғатова «Қазақ тілін шет тілі немес екінші тіл ретінде оқыту», YOUTYBE бейнепорталындағы «Казахский язык за 2 недели» бейнесабақтарының авторы Досжан Нұрсейітов «Қазақ тілін ақпараттық коммуникациялық технологиялар мүмкіндігін пайдалана отырып жеделдете оқыту» тақырыптары аясында өз ойларын ортаға салды.
Біз семинар-тренинг кейін «Қоғамдық келісім» РММ-нің бас сарапшысы Әділет Дүйсенбиевпен тілдескен едік.
– Шын ден қойса, кез келген тілді меңгеру еш қиын емес. Мұны латын әліпбиіне де қатысты айтар едім. Мені жастардың ынта-жігері ерекше қуантады.
Елбасымыз «»Болашаққа бағдар: рухани жаңғыру» мақаласында таяу жылдардағы міндеттердің бірі ретінде ісқағаздарын, мерзімді баспасөзді, оқулықтарды латын әліпбиімен басып шығару қажеттігін алға тартты. Қазірдің өзінде алғышарттар басталып кеткенін көріп отырмыз. Үкіметке қазақ тілін латын әліпбиіне көшірудің нақты кестесін жасау тапсырылды. Жыл аяғына дейін қазақ әліпбиінің жаңа графикадағы бірыңғай стандартты нұсқасы қабылданарына сенімдімін. Бұл орайда, ғалымдарға, тіл мамандарына, барша қоғам өкілдеріне үлкен жауапкершілік жүктеліп отыр.
Қызылжар өңіріндегі талқылаулар солтүстікқазақстандықтардың да мемлекеттік маңызды іске бейжай қарамайтынын көрсетіп берді, – деді ол.
Өмір ЕСҚАЛИ,
«Егемен Қазақстан»
Солтүстік Қазақстан облысы
