ЕҚЫҰ-ның төрағасы Аустрия тарапы аталған іс-шара жаңаша ойлауға және қоршаған орта саласындағы мәселелерді бірлесе шешуге үлес қосатынын айтып, «жасыл» экономика мәселелеріне аса мән беретінін мәлімдеді. Осы орайда ЕҚЫҰ Экономика және экология комитетіндегі Қазақстанның төрағалығын ерекше атап өтті және Ұйымның Экономикалық және экологиялық форумының (ЭЭФ) екінші дайындық жиналысы биыл маусымда Астанада өткен ЭКСПО-2017 халықаралық мамандандырылған көрмесі шеңберінде ұйымдастырылуының маңыздылығына назар аударды.
ЕҚЫҰ Экономика және экология комитетінің төрағасы, Қазақстан Республикасының ЕҚЫҰ-дағы Тұрақты өкілі Қайрат Сарыбай Қазақстанның қоршаған орта саласында «Қазақстан-2050» Стратегиясы, «Үшінші жаңғыру» және «Жасыл көпір» халықаралық бағдарламалары шеңберінде жүргізіліп жатқан жұмыс туралы егжей-тегжейлі ақпарат ұсынды. Сондай-ақ ЭКСПО инфрақұрылымы негізінде Астанада құрылатын «Болашақтың энергиясы» жасыл технологиялар және инвестициялық жобалар халықаралық орталығының жұмысына ЕҚЫҰ үлес қоса алатынын атап өтті.
Шараға Қазақстан экологиялық ұйымдарының төрайымы Айгүл Соловьева мен «Халықаралық аралды құтқару қоры» су ресурстары департаментінің жетекшісі Әмірхан Кеншімов қатысып, жиналыс барысында көтерілген өзекті мәселелер бойынша ойларымен бөлісті.
Атап айтқанда, Ә.Кеншімов су мәселелеріне арналған сессия барысында халықаралық ұйымдармен, оның ішінде ЕҚЫҰ-мен бірлесе Арал теңізін құтқару шеңберінде жүзеге асырылған жобалар туралы хабардар етті және Қазақстанда су шаруашылығы мамандарын даярлау туралы мағлұмат ұсынды.
А.Соловьева энергетика тиімділігі мен жаңғырмалы энергетика тақырыбына арналған сессияда спикер ретінде Қазақстан үкіметі мен қоғамдық бірлестіктердің аталған саладағы жұмысы туралы толымды ақпарат берді.
Италияның ЕҚЫҰ-дағы Тұрақты өкілі Алессандро Азони қорытынды сессияда өз елінің 2018 жылы ұйымға төрағалығы барысында Германияның 2016 жылғы және Аустрияның үстіміздегі жылғы төрағалықтарының екінші өлшемдегі басымдықтарын жалғастыратынын және ЭЭФ-тің бірінші дайындық жиналысын цифрлы пішімге көшіру, екінші дайындық жиналысын адам капиталын дамыту мен жыл сайынғы Прага форумын жақсы басқару және жауапты басшылық тақырыбына арнайтынын мәлімдеді. Сонымен қатар Италия төрағалығы барысында бизнес-конференция жоспарланғанын атап өтті.
Айта кетейік, алдағы 7-8 желтоқсанда Венада өтетін ЕҚЫҰ Министрлер кеңесінің нәтижесі ретінде ЕҚЫҰ Аустрия төрағалығы комитеттегі Қазақстан төрағалығымен бірлесе экономика және қоршаған орта бойынша шешім жобаларын қабылдауды жоспарлауда.
«Егемен-ақпарат»
