Оған әлемнің 32 елінен 300-ге жуық ауылшаруашылық компаниясы жиналды. Биыл сегізінші рет өтіп жатқан айтулы шараның аясы жылдан жылға кеңейіп келеді. Ауыл шаруашылығы министрлігі, Астана қаласы әкімдігі мен «ҚазАгро» ұлттық басқарушы холдингі» АҚ-тың ресми қолдауымен жүзеге асқан көрмені «ExpoGroup» халықаралық көрме компаниясы ұйымдастыруда.
Үш күнге жалғасатын көрменің аумағы 14 000 шаршы метрді алып жатыр. Бұл жиын ең алдымен еліміздің мал және ауылшаруашылық өнімдерін өндіруде негізгі қозғаушы күш болмақ. Шараның ашылу салтанатында Ауыл шаруашылығы вице-министрі Ерлан Нысанбаев Премьер-Министрдің орынбасары – Ауыл шаруашылығы министрі Асқар Мырзахметовтің құттықтау сөзін жеткізіп, көрмеге қатысушыларға сәттілік тіледі.
«Аграрлық сала – Қазақстандағы жетекші салалардың бірі. Ол еліміздің экономикалық қауіпсіздігін қамтамасыз етуде үлкен рөл атқарады. Мемлекет басшысы Нұрсұлтан Назарбаевтың бастамасымен қабылданған осы саланы дамытудың 2017-2021 жылдарға арналған бағдарламасы отандық өндірушілерді қолдаудың басты құжаты болып отыр. Бұл жоба бойынша бүгінгі халықаралық көрменің отандық тауар өндірушілерге берері мол деп санаймын. Тауар айналымы өрісінің кеңеюі мен өндірістер арасындағы әріптестік байланыстың дамуы соның айғағы болады дегенге сенемін», деді Ерлан Нысанбаев.
Вице-министрдің сөзінше, елімізде агроөнеркәсіптік кешенді дамыту мемлекеттік бағдарламасы аясында импортты алмастыру бағыты айқындалған.
Осы бағдарламаның негізгі міндеттерінің бірі бәсекеге қабілетті өнімнің отандық өндірушілерін қолдау болып табылады. Осы аспектіде «КазАгро-2017», «KazFarm-2017» көрмесі отандық агробизнестің шетелдермен ынтымақтастықты кеңейтуге, сауда-экономикалық қатынастарды дамытуға, әріптестік орнатуға дайындығы туралы Қазақстан Республикасының әлеуетінен хабардар етеді. «Таяуда Парламент Мәжілісінде «Жол картасы» таныстырылды, ол арқылы жақын арадағы отандық техниканы шығарудың техникалық агрегаты мен ауылшаруашылық көліктері паркін анықтайды. Мемлекеттік қолдау да қарастырылатын болады. Біз ауқымды істің алдында тұрмыз. Бүгінде отандық машина жасауды дамытусыз ауылшаруашылығын өрістету әлеуеті төмен болмақ», деді Е.Нысанбаев.
Алыс-жақын шетелдерден және отандық тауар өндірушілерден құралған барлығы 300-ден астам компания Астанадағы «Көрме» орталығында үш күн бойы түрлі шараларды, келісімшарттар мен бизнес жоспарларды, тәжірибе алмасулар мен келіссөздерді талқылайтын болады.
Көрмеге қатысуға арнайы келген Қатар мемлекеті муниципалитет және қоршаған ортаны қорғау министрінің орынбасары Фалех бин Насер әл-Тани биыл бұл көрмеге алғаш рет қатысқандарын, дегенмен, ауылшаруашылық тауарын өндіру Қатар үшін жат еместігін әңгімеледі. «Біз Қазақстанмен екі арадағы бұрыннан жалғасып келе жатқан өзара тиімді ынтымақтастықты жетілдіре түсеміз. Осы көрме барысында біз ең озық тәжірибелер мен ауыл шаруашылығы саласындағы соңғы үлгідегі жаңа технологиялармен танысатын боламыз», деді Фалех бин Насер әл-Тани.
Көрмеде ауыл шаруашылығы мен тамақ өнеркәсібі саласындағы жетістіктер, сондай-ақ мал шаруашылығындағы инновациялар ұсынылады. Жыл сайынғы әртүрлі елдердің ұлттық стендтерінің қатарын биыл Испанияның және Ресей Федерациясының Түмен облысы Сауда-өнеркәсіптік палатасының стендтері толықтырған. Негізгі павильонды «Ауылшаруашылық техникасы, жабдық және ілеспе тауарлар» блогы алған.
Мұнда техниканың стационарлық және жеке көрсетілімдері, сондай-ақ ауылшаруашылық кластерлерінің көрмесі өтуде. «Өсімдік және көкөніс шаруашылықтары» блогында компаниялар өсімдіктер селекциясының әдістерін, ең жаңа технологияларын, сондай-ақ өсімдік сұрыптарын ұсынған.
«Мал шаруашылығы» бөлімінде Қазақстанда өсірілетін асыл тұқымды ірі қара мал түрлерімен танысуға болады.
Асхат РАЙҚҰЛ,
«Егемен Қазақстан»
Суреттерді түсірген
Ерлан ОМАР,
«Егемен Қазақстан»
