Әулиеата өңірінде бүгінде цифрлы технологияны қолдану арқылы жаңа индустрияларды өркендетуге көңіл бөлініп келеді. Көне Тараз шаһарын Жолдауда айтылған міндеттер арқылы одан әрі дамыту және өңірде цифрлы технологияны енгізу жұмыстары қолға алынды. Бұл өз кезегінде экономиканың жедел дамуына да оң серпін беретіні анық. Сонымен қатар нәтижелі істердің бірі – болашақта қала көшелерінде электрлі автобустар да жүре бастайтын болады. Бұл бір жағынан, экономиканың дамуына қолайлы жағдай туғызатын болса, екінші жағынан, экологиялық тұрғыда да тиімді болмақ.
Жуырда Жамбыл облысының әкімі Кәрім Көкірекбаев Қытай Халық Республикасына жұмыс сапарымен барып, Сучжоу қаласында орналасқан «Higer Quazar» өндірістік кешенінде болып, осы кешеннің жұмысымен танысқан болатын. Әкім аталған компанияның атқарушы директоры Хуан Шун Кин және «Higer Quazar» өндірістік кешенінің өкілдерімен кездесіп, «Жасыл экономика» бағдарламасы аясында экологиялық тұрғыдан зиян келтірмейтін қоғамдық көліктің тиімділігін талқылаған еді. Сондай-ақ мұнда қалааралық және қалаішілік қоғамдық көліктерді сатып алу, «Quazar» атты электрлі автобустар құрастыратын зауыт құрылысын Тараз қаласында бастау жайы да қаралды.
Болашақта бұл бастама өңір әлеуетін арттыруға да үлкен үлес қоспақ. Еске сала кетсек, қос тарап жылына 300 электрлі автобус шығаратын зауыттың құрылысын «Тараз» индустриялық паркі аумағында салу туралы меморандумға қол қойған болатын. Жобаның құны 3 миллиард теңгені құрайды. Тараптар арасындағы ынтымақтастықтың мақсаты инвестициялық жобаны іске асыру болып табылады. Айта кетерлігі, биылғы жылдың басында Алматы қаласында «Higer Quazar» экологиялық таза электрлі автобустар шығаратын зауыт пайдалануға берілген болатын. Аталған компания екі түрлі электрлі автобустарды құрастырады. Ал биыл Астана қаласында өткен ЭКСПО-2017 халықаралық мамандандырылған көрмесі кезінде «Higer Quazar» қазақстандық электробус алғаш рет қала көшелерімен жүрген болатын.
Бүгінгі таңда Тараз қаласында экологиялық таза қоғамдық көлікті іске қосу, сондай-ақ қазақстандық қондырғылардың электромобильдеріне арналған аккумуляторлық батареялар өндірісін ашу жоспарланып отыр. «Бұл бастама біз үшін экологиялық та, экономикалық та жағынан тиімді. Жаңа үлгідегі автобустар ауаны ластамайды және дыбысы да қатты шықпайды. Мұның тағы бір тиімділігі – батарея арқылы жүретін автобустардың жеті-ақ минутта қуатын толықтыруға болады екен.
Бұл алдағы уақыттарда үлкен бір игілікті іс болайын деп тұр», дейді Тараз қаласының әкімі Рүстем Дәулет.
Жолдауда жаңа индустриялар қалыптастырудың маңызды шарты инновацияны қолдау және оларды өндіріске тезірек енгізу болып саналатындығы айтылған еді. Болашақта Тараз көшелерінде электрлі автобустар жүріп, жолаушылар тасымалын одан әрі дамытуға септігін тигізсе, бұл да жаһандық бәсекеге қабілеттіліктің бір көрінісі болмақ. Ал жаһандық бәсекеге қабілеттілік өз кезегінде мемлекеттің де, ұлттың да алға қойған мақсатын айқындайды.
Хамит ЕСАМАН,
«Егемен Қазақстан»
Жамбыл облысы
