Орталық қызметкерлері бұған дейін өздігінен жүріп-тұра алмайтын, қол арбаға таңылған ардагерлерді жоғары қабаттарға өз күштерімен көтеріп шығарып жүріпті. Енді жаңа құрылғының көмегімен қоларбада отырған қарияларды жоғарғы-төменгі қабаттарға емін-еркін көтеріп-түсіруге болады.
«Мына құрылғы өте қолайлы екен. Бұдан былай бізге қарайласатын әлеуметтік қызметкерлерді бұрынғыдай көп әуреге түсірмейтін шығармыз. Жаңа құрылғы осы мекемедегі қоларбамен жүріп-тұратын қатарластарымызға үлкен көмек болады деп ойлаймын. Игі іске ұйытқы болған жандарға ерекше алғысымызды айтамыз», дейді Қарттар үйі тұрғындарының бірі, өзі де қоларба көмегіне жүгінетін қария Александр Серебряков.
«Қазцинк» компаниясының Өскемендегі кәсіподақ ұйымының төрағасы Николай Потапенко жуықта осында іс-шара өткізгенде ардагерлер тарапынан жаңа құрылғының қажеттігі жөнінде өтініш түскенін айтады. «Біздің компания ардагерлерді ешуақытта назардан тыс қалдырған емес. Әрдайым қолдап, қоштап, демеп отырады. Жалпы, аға буын өкілдеріне қандай құрмет көрсетсек те артықтық етпейді», дейді ол.
Азамат ҚАСЫМ,
«Егемен Қазақстан»
ӨСКЕМЕН
