Күйші Мұрат Өскінбаев атындағы Маңғыстау облыстық филармония жанынан 1995 жылы құрылған оркестр жиырма жылдан енді асатын өз тарихында кәсіби тұрғыдан жан-жақты жетіліп, репертуарын молайта түсті. Өзіндік ізденіс көкжиегін кеңейтуді қазақ өнері мен мәдениетін жастарға насихаттау және оны өзге елдерге таныту бағытымен бірге алып келеді. Украина, Ресей, Әзербайжанда өнер көрсеткен ұжым ел ішіндегі айтулы шаралардан, байқаулардан тыс қалмайды және жүлдесіз де емес.
Бүгінде репертуарлық қоржыны 800-ден астам шығармамен толыққан оркестр құрамында есімі елге танымал Қазақстанның Еңбек сіңірген қайраткерлері Сержан Шәкірат, Роза Айдарбаева, Қазақстанның Мәдениет қайраткерлері Нұрияш Оспанова, Жоламан Көшкінов, Қазақстанның Мәдениет саласының үздіктері Асқар, Асанәлі Көшеровтер, Ақмарал Ерімбетова, «Құрмет» орденінің иегері Тамара Асар және басқа да танымал күйшілер мен саңлақ өнерпаздар қызмет етеді.
Жиырма жыл ішінде құрамы 60 адамға артқан ауқымды өнер ұжымының басты мәселесі аспаптар үнінің біркелкі болмауында болып отыр. Ал ол оркестр орындауындағы шығармалардың дыбыстық селкеулігіне әкеліп соқтырып, өнерпаздардың шығармашылық шеберлігіне, тұлғалық имидждеріне нұқсан келтіреді екен.
– Оны болдырмау үшін аспаптар бір шебердің қолынан шығуы және домбыра – тенор, бас-домбыра, контрабас-домбыра, флейта, гобой, қобыз-прима, баян, шертер, виолончель, домбыра прима аспаптары бірдей материалдан жасалуы тиіс. Осы мәселенің себебінен және оркестр құрамының артуына байланысты, оркестрді жаңа музыкалық аспаптармен қамту қажеттігі туындап отыр, – дейді Маңғыстау облыстық филармониясының қызметкері, әнші Күләш Досмұхамбетова.
«Ұста пышаққа, етікші бізге жарымайды» дегендей, ұлт өнерін насихаттап жүрген өнер ұжымының қалауы да өнерге, аспапқа қатысты болып шықты. Демек өнер өз деңгейінде өрістеуі үшін аспапқа қатысты кем-кетіктің болмауы қажет-ақ.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
