Жуырда Білім және ғылым министрлігіне қарасты «Халықаралық бағдарламалар орталығы» АҚ қолдауымен Астанада халықаралық білім көрмесі өтті.
Көрменің негізгі мақсатына келер болсақ, ғылым, білім және инновациялық технология саласындағы әлемдік жетекші, сонымен қатар өз Отанымыздағы білім мекемелері арасындағы іскерлік қарым-қатынасты нығайтуға бағытталған. Шетелдік жоғары оқу орнына түсуге арналған әзірлік курстары бағдарламалары бойынша тілдік курстар өткізу, кәсіби біліктілікті арттыру, семинарлар, тренингтер мамандарды қайта даярлау бойынша жоғары оқу орындарында оқу мүмкіндіктері жайлы ақпараттармен таныстыру да негізге алынған.
Өркениетті елдермен мемлекетіміздің байланысына келетін болсақ, бұл істерде үлкен ілгерілеушіліктер бар екені жұртқа мәлім. Әсіресе, Ұлыбритания, АҚШ, Ирландия, Малайзия, Германия, Франция, Канада, Түркия, Швейцария, Испания, Ресей мемлекеттерімен студенттер алмасу жақсы жолға қойылған.
Ал мұндай көрме «Stydylnn» мен «A2 International Education Faris» білім орталықтарының бірігуімен жыл сайын өтіп отыратынын да айта кетсек дейміз. Мәселен, өткен жылы көрмеге 10 елден 50-ге жуық білім мекемелері қатысса, биыл 12 елден 70-ке жуық жоо атсалысқан. Бұл дегеніңіз, шетелдік жетекші университеттермен еліміздің озық университеттері студенттер мен мектеп оқушыларының қызығушылығын жылдан-жылға арттыруға талпынып отырғанын көрсетеді. Биылғы көрменің басты ерекшелігі, білім саласының жетекші мамандарын нақты ұсыныстар мен шетелдік оқу орындарына түсудің мән-жайы туралы семинар өткізу болды.
Сүлеймен МӘМЕТ.