Облыс әкімі Даниал Ахметовтің Семейге келген сапарында бұл мәселе тағы да көтерілді. Мұндағы радиациялық сұйықтықты сақтайтын, елдің барлығын шулатып отырған жабдық-қорап Шымкенттің бір кәсіпорнында жасалған екен. Ал жоба бойынша мердігерлер бұл құрал-жабдықты Германиядан әкелеміз деп ұйғарса керек. Халық үшін аса маңызды нысанның әлі күнге дейін пайдалануға берілмей отырғандығын облыс әкімі тағы бір мәрте түсіндірді.
– Сот ісі қараған сайын жаңадан фактілер анықталу үстінде, − деді облыс әкімі Даниал Ахметов, − мәселен, Шымкентте дайындалған сапасыз жабдық іске жарамсыз. Әу баста мұны Германиядан әкеледі деп сендірген. Әрине, мен түсінемін, халық шаршады. Осымен он рет комиссия қарады. Бірақ тағы бір нақты комиссия құру керек деп ойлаймын. Менің тапсырмам бойынша, осы күрделі проблеманы шешудің бірнеше жолы қарастырылып отыр. Радиациялық қалдықтарды жинап, сақтайтын жабдықты ауыстыру керек. Өйткені сапасыз, сондықтан сенімсіз жабдық. Мұның қауіпсіздігі радиологиялық орталықта істейтін медицина қызметкерлері мен науқастардың денсаулығы үшін аса маңызды.
Даниал Ахметовтың айтуынша, осы жабдықты қойған мердігер компанияның бұл қызмет түріне әу баста ешбір заңды құқығы болмағандығы анықталғандығы жөнінде сот шешімі өз күшіне еніпті.
– Мердігерлер мұнда ойына келген дүниесін жасаған. Оларды ешкім қадағаламаған. Тіпті бас мердігердің де, жабдықты орнатқан қосалқы мердігердің де жұмысын ешкім қарамаған. Лицензиялары бар ма, жоқ па, оны тексерген ешкім жоқ. Ақыры міне, қалай тексересе де, мәселе қайта-қайта басына келіп тіреледі. Әйтсе де, біз бұл нысанды пайдалануға береміз. Адамдар осында емделетін болады, – деді Даниал Ахметов.
Раушан НҰҒМАНБЕК,
журналист
СЕМЕЙ
