Ендігі жерде туысқандарымен бизнес бастауға бел байлағандарға арнайы курстарға қатысып, кеңес алып отырған артықтық етпейді. Арнайы бизнес-тренингтерде ағайындар арасында кикілжіңдер мен түсініспеушіліктер туындатпаудың жолдары түсіндіріледі.
Бұл жобаға Қазақстандағы отбасылық бизнес қауымдастығы мұрындық болып, Алматы қаласының кәсіпкерлер палатасы мен бірқатар ұйымдар қолдау танытып отыр.
Қалалық кәсіпкерлер палатасы алдымен әлемге танымал отбасылық бизнес біздің елімізде оншалықты дамымағанын алға тартты. Отандастарымыз ақшаға бола туысқандық қарым-қатынасты бұзып алмас үшін ағайындарымен бірге іс бастауға абайлап қарайды. Алайда статистика басқаша сөйлейді. Шет мемлекеттерде экономиканың дамуына отбасылық бизнестің беріп отырғаны қомақты көрінеді. Мәселен, АҚШ-та әрбір бесінші компания отбасылық бизнеспен айналысады. Еуропа елдеріндегі, Жапониядағы компаниялардың 80 пайызы туыстардың ортақ кәсібі болып табылады. Ал Үндістандағы кәсіпорындардың 95 пайызы отбасылық бизнеске тиесілі.
«Біз бизнес пен туыстық байланыстар қабыспайды деген таптаурын көзқарасты жою үшін «Әулет» жобасын қолға алдық. Елімізде мұндай тренингтер алғаш рет өткізіліп отыр. Жобада кәсіпкерліктің көздері ғана емес, серіктестермен, яғни туыстармен тату қарым-қатынасты сақтай отырып, жұмыс пен табысты қалай бөлу керектігі үйретіледі. Бізде жиі қайталанатын қателік – келісімшарттарда тараптардың құқықтары мен міндеттері атап көрсетілмейді. Әрі отбасылық кәсіпорын әдетте ұзақ жылға есептелген бизнес екенін ұмытпаған жөн. Осы ретте аз ғана табысты емес, компанияның абыройын есте сақтаған абзал», деп атап өтті Қазақстандағы отбасылық бизнес қауымдастығы үйлестіру кеңесінің төрайымы Яна Исакова.
Сонымен, оқу курстары 28 қазаннан басталды. Кездесу алты апта бойы әр жұма сайын өтеді. Өңірлердегі ағайындар әрі-бері шапқыламай-ақ, тренингтерге онлайн режімде қатыса алады.
Айнаш ЕСАЛИ,
«Егемен Қазақстан»
