Депутаттар талқысына түскен алғашқы құжат «Еуразиялық экономикалық одақтың Кеден кодексі туралы шартты ратификациялау туралы» заң жобасы болды. Бұл заң жобасы Жоғары Еуразиялық экономикалық кеңестің отырысында 2017 жылдың 11 сәуірінде Мәскеуде жасалған Еуразиялық экономикалық одақтың Кеден кодексі туралы шартты ратификациялауға бағытталған.
«Осы шарт негізінде кедендік реттеу саласында мынадай басым бағыттар енгізіліп отыр: тауарларды қатысушы елдердің кедендік аумағына әкелуге немесе әкетуге, кедендік декларациялауға және тауарлар шығаруға байланысты кедендік операцияларды жасаған кезде «бірыңғай терезе» тетігін пайдалану; электронды кедендік декларациялаудың басымдығы; кедендік декларация тіркелген кезден бастап төрт сағат ішінде тауарлар шығаруды жүзеге асыру; кеден органдарының ақпараттық жүйелерімен автоматты түрде кедендік декларацияны тіркеуге және тауарлар шығаруға байланысты кедендік операцияларды жасау мүмкіндігі реттеледі», деді Т.Сүлейменов.
Оның түсіндіруінше, бұл заң жобасының негізгі мақсаты Еуразиялық экономикалық одақта бірыңғай кедендік реттеуді қамтамасыз ету болып табылады.Күн тәртібіне сай талқыланып, бірінші оқылымда мақұлданған келесі құжат «Қазақстан Республикасындағы кедендік реттеу туралы» кодекс жобасы болды. Бұл кодекс жобасын Еуразиялық экономикалық одақтың жаңа Кеден кодексіне сәйкес келтіру мақсатында әзірленген. Сол себептен де кодекс жобасында уәкілетті экономикалық оператор мәртебесі берілуі мүмкін заңды тұлғалардың санаттарын ұлғайту көзделеді.
Сонымен қатар сыртқы экономикалық қызметке қатысушыға тауарларды кедендік декларациялау кезінде кедендік баждарды төлеуді кейінге қалдыруға немесе бөліп төлеуге мүмкіндік беріледі. Оған қоса, алдын ала ақпарат берілуі мүмкін кедендік операциялардың түрлерін кеңейту мен ауызша сауалнама, кедендік бақылау, тауарлардың таңбалануын тексеру, кедендік бақылаудағы тауарларды есепке алу сияқты қызметтерді реттеу тетіктері де қарастырылады.
Депутаттар тарапынан қолдау тапқан құжаттың соңғысы заңнамалық актілерге кедендік реттеу мәселелері бойынша өзгерістер мен толықтырулар енгізу жайын арқау еткен заң жобасы болды. Аталған құжат «Қазақстан Республикасындағы кедендік реттеу туралы» кодекс жобасында көзделген нормаларды іске асыруды мақсат етеді. Сондықтан да заң жобасы бюджет кодексіне аванстық төлемдер үшін бюджетке түсімдердің түрін айқындауға және тауарларды жою мүмкіндігі туралы материалдарға мемлекеттік экологиялық сараптама қорытындысын беретін қоршаған ортаны қорғау саласындағы уәкілетті органның құзыретін бекітуге кодекс жобасының нормаларын сәйкес келтіруге бағытталған. Бұл заң жобасында Қазақстан Республикасының 25 заңнамалық актісіне, оның ішінде 6 кодекске және 19 заңға өзгерістер мен толықтырулар енгізу ұсынылған.
Айта кетейік, осы күні Мәжіліс депутаттары конституциялық заңдарға түзетулер енгізуге қатысты заң жобасын өндірістік жұмысқа қабылдап, салалық ведомстволар мен Үкімет басшысының атына өз құзыреттері шеңберінде сауалдарын жолдады.
Нұрлыбек ДОСЫБАЙ,
«Егемен Қазақстан»
