Айтса айтқандай, қазіргі таңда аталған министрліктің алдына зор міндеттер қойылған. Тамырын терең жайып үлгерген бүлдіргі діннің зардабымен күрес мол күш-жігерді талап етеді. Әсіресе, әсіредіншіл уағызшылардың арбауына түскен өрімдей жастардың бетін қайтару оңайға түспей отыр. Іркіліссіз, үздіксіз түрде санаға сіңіріліп жатқан теріс уағыздардың уыты қазірдің өзінде қоғамдық, тіпті мемлекеттік қауіпсіздікке қатер төндіре бастағандай. Өйткені бүгінгі күнде теріс ағым серкелері өздерінің жымысқы мақсаттарын іске асыру үшін ақпараттық технологияны барынша тиімді пайланауға ұмтылуда.
Дін істері және азаматтық қоғам министрлігінің ресми мәліметіне сәйкес, биылғы жылы іс-әрекеті мен саясаты қолданыстағы заңдарымызға қайшы келетін 2,5 мың интернет-ресурс анықталған. Сонымен қатар аталған ведомствоның мамандары ғаламтордағы 5527 ақпарат ресурсына зерттеу жүргізіп, 2487 заңсыз материалды тапқан. Заңбұзушылықтар анықталған сайттар бойынша жасалған сараптамалық қорытындылар Ақпарат және коммуникациялар министрлігіне аталған сайттарды бұғаттау және тиісті техникалық шаралары қабылдау үшін жіберілген.
Бүлдіргі дін серкелері ұялы телефон арқылы да арам пиғылдарын іске асыруға әбден әккіленіп алғанға ұқсайды. Жасыратыны жоқ, қазір ірі-ірі қалалардағы ұялы телефон сатумен айналысатындардың көбі біз үшін дәстүрлі емес дін өкілдері. Бір қуанарлығы, бүгінде тәртіп сақшылары бұл бағыттағы заң бұзушылықтарды әшкерелеу барысында барынша батыл қимылдауда. Бұған мысал ретінде осыдан біраз бұрын Шымкент қаласында мобильдік құрылғылардың идентификациялық кодын өзгертіп, оған экстремистік сипаттағы ақпараттарды жазып, сатқандардың құрықталғанын айтсақ та болады.
Міне, қарап тұрсаңыз, теріс пиғылды ағым өкілдері өздерінің идеологиясын тықпалау үшін ақпараттық құралдың қандайынан болса да бас тартар емес. Ілгеріде діни әдебиеттерге иек артушы еді, қазір интернет-ресурсты, ұялы байланыс түрлері секілді кез келген ақпарат көзін асқан қомағайлықпен пайдалануда.
Бүлдіргі ағымның бүгінгі идеологтары адам санасына шабуыл жасауды кәсіби тұрғыда меңгерген. Теріс ілімнің танымал деген өкілдері тәжірибесі аз, пікірсайыстан хабары жоқ өз құрбандарымен сөз таласына түскенде ислам постулаттарын өз мүдделеріне сай, өзгешелеу етіп түсіндірудің шебері болып алған. Соның салдарынан, түптің түбінде санасы уланатын адамдар жалған ұстаздардың әлгі «өзгешелеу» тұжырымдарын жалғандағы жалғыз ғана ақиқат ретінде қабылдап жатады.
Өкініштісі сол, теріс ағымдағылардың идеологиясы мемлекет пен қоғамдағы өскелең ұрпақты нысана етіп алады. Ал мұндай жағдайда жетекте кеткен жастар аталған идеологияны жалғастырушы ғана емес, оның мақсат-мүддесін жүзеге асырушыға да айналып шыға келеді. Олар, тіпті зайырлы мемлекеттердің саяси билігімен қарулы қақтығыстарға барудан да тайынбайды. Міне, қауіптің көзі қайда жатыр!
Жалпы Қазақстан Республикасының заңнамасына қайшы келетін материалдар анықталған жағдайда діни сараптама жүргізу ережелеріне сәйкес, оны республика аумағында пайдалануға және таратуға рұқсат етілмейді. Бұл істі күшейте түсу үшін, әрине қолданыстағы заңдарымыздың заман талабына сай сапасы мен әлеуетін таразыға тағы бір мәрте салып алғанымыз абзал. Негізі, бұл бағытта министрлік тарапынан жүргізіліп жатқан жұмыстар көңілге сенім ұялатады. Мысалы, қазіргі уақытта діни қызметті реттейтін заңнамаға түзетулер енгізу жөніндегі құжаттар әзірлену үстінде. Оның негізінде 9 заңға және 2 кодекске жалпы саны 52 түзету енгізу қарастырылған екен.
Иә, «Ауру батпандап кіріп, мысқалдап шығады» дейді қазақ. Санаға сіңгенді безді алғандай сылып тастаудың әуре-сарсаңы мол болса да, бұл бағыттағы ымырасыз күрес үзіліссіз һәм үздіксіз жүргізіле беруі тиіс. Әйтпеген күнде сан соғып, опық жеп қалуымыз да әбден мүмкін.
Қайрат ӘБІЛДА,
«Егемен Қазақстан»
