Бұл күнде 20 мыңнан астам тұрғыны бар аудан орталығында аталған мәселе күн өткен сайын күрделеніп, шешімін табуы қиындап барады. Жекелеген тұрғын үйлерге газ жеткізу халық үшін арман десе де болғандай. Мердігер «Париев» жауапкершілігі шектеулі серіктестігі 2014 жылы Төле би ауылына газ құбырларын тарту үшін тұрғындармен кездесу өткізіпті. Арнайы хаттама негізінде газ құбырларын 420 мың теңгеден орнатуға келіскен. Алайда ауыл халқының айтуы бойынша, өзге ауылдарда газ құбырын тарту құны 300-350 мың теңгенің көлемінде екен. Ауданның құрметті азаматы Мәкен Уақтегі «Париев» ЖШС-нің басшылары халықтың жағдайына қарамай, бағаны шарықтатып жібергеніне наразылық білдірді. «Мұндай қаражат жұрттың бәрінің бірдей қолында бола бермейді. Сонда да «Париев» басшылары халықтың жағдайын көре тұра бағаны шарықтатып жібергені халықтың наразылығын тудыруда. Мәселен, аталмыш мердігердің Төле би ауылында жұмыс бастағанына 3 жылдан асты. Бірақ әлі күнге дейін оң нәтиже көріп отырған жоқпыз», дейді ол.
Араға біраз уақыт салып аталмыш мердігер бағаны тағы да 570 мың теңгеге көтеріп жіберген. Ал 420 мың теңгенің өзін қымбат деген тұрғындар бұл шешіммен мүлде келіспейтіндіктерін жеткізді. «Қарапайым халықтың 570 мың теңгені төлеуге шамасы жетпейтіні белгілі ғой. Сондай-ақ газ құбырын жер астымен емес, жер үстімен жүргізу қымбатқа түседі. Және Шу қаласындағы жер астымен жүргізілген құбырлардың өлшемі біркелкі болса, Төле би ауылында әртүрлі. Сол себепті кейбір тұрғындарға газ мөлшері аз көлемде беріліп, бұл олардың да наразылығын тудырып отыр. Сондықтан мердігердің бағаны қайта-қайта құбылта беруіне қарсымыз», дейді ауыл тұрғыны Нұрлыхан Бердиев.
Қарапайым халық аталған бағаны несие алып болса да төлеген күннің өзінде, көгілдір отынның пешін, тағы да басқа қажетті дүниелерін алу керек. Мұның бәрін есептейтін болсақ, тіпті газ кіргізу 800 мың теңгеге дейін кетіп қалады дейді тұрғындар. Ал «Париев» ЖШС директорының орынбасары Нұрхожа Дүйсенбековпен сөйлескенімізде, ол бұл мәселені нарықтағы бағаның көтеріліп кетуімен байланыстырды. «Расында да баға 570 мың теңгеге дейін өскен. Алайда бүгінде ол 475 мың теңгеге түсіп отыр. Себебі Үкімет Шу қаласы мен Төле би ауылына дейінгі газ жүретін магистральды жолды сатып алды. Бұл халыққа жеңілдік болып отыр. Енді Үкімет тағы да Төле би ауылындағы газ жүретін магистральды жолды сатып алатын болса, тұрғындар 120 мың теңге ғана төлейді», дейді ол.
Баға 120 мың теңгеге түсе ме, түспей ме, ол жағы белгісіз. Бүгінде Шу ауданының көптеген ауылдары көгілдір отынмен қамтамасыз етілген. Бірақ аудан орталығындағы осы бір күрделі жағдай тұрғындар үшін әлі де түйткілді. «Бұл мәселе бойынша біз халықпен жиналыс өткіздік. Қазір Төле би ауылына көгілдір отын тартудағы осы мәселелерді Ұлттық экономика министрлігі Табиғи монополияларды реттеу және бәсекелестікті қорғау комитетінің Жамбыл облысы бойынша департаменті қарау үстінде. Бүгінгі таңда 250 үй көгілдір отынмен қамтамасыз етілді. Тағы 250 үй газ кіргізу үшін келісімге отырды. Сондай-ақ халықтың жағдайын ескеріп, біз «Париев» ЖШС-на тұрғындардың әрқайсысынан әуелі 100 мың теңгеден ғана алуды ұсынып отырмыз. Қалғанын несие есебінде ай сайын бөліп төлеуді де қарастырудамыз», дейді әкімнің орынбасары Нұрлан Жақсыбаев.
Енді әкім орынбасарының дегені болатын болса, бұл да халық үшін үлкен жеңілдік. Бірақ оны ай сайын төлеп тұру да тұрғындарға оңай соқпайтыны анық. Бір қызығы, осы уақытқа дейін Шу қаласы мен Көкқайнар, Ескі-Шу, Жаңажол, Бірлік, Жаңақоғам ауылдық округтері мен Қонаев ауылына «ҚазТрансГазАймақ» АҚ Жамбыл өндірістік филиалының мердігерлері газ құбырын 310 мен 350 мың теңгенің аралығында орнатып беріпті. Ал төлебиліктерге келгенде баға шарықтаған үстіне шарықтап кете берген.
Халықтың әлі де бағаның тұрақтануына сенімі мол. Егер аталған мәселе шешімін табатын болса, аудан орталығы да көгілдір отынмен қамтамасыз етіледі. Бірақ неше жылға созылып келе жатқан көгілдір отын мәселесімен төлебиліктер әлі де талай уақыт арпалысамыз ба деген пікірде.
Хамит ЕСАМАН,
«Егемен Қазақстан»
Жамбыл облысы
