Алматыда ҚХА ІІІ халықаралық медиа-форумы өтті

Форумның ҚазҰУ-де ұйымдас­тырылып отыруы кездей­соқ емес. Себебі Қазақстан журналистикасына қызмет етіп келе жатқан тілші мамандардың бірнеше буынын тәрбиелеп, ұлттық журналис­ти­ка­­ның қалыптасуы жолында ма­ңыз­ды міндет арқалап келе жатқан қара­шаңырақ осы уни­вер­ситет болып есептеледі. Универ­ситеттің жур­на­листика факуль­тетінен түлеп ұш­қан білік­ті мамандар, сыр­т­­тан келген сарапшы мей­ман­дар қо­ғамды руха­ни жаң­ғырту мен сананың ашық­ты­ғын қалып­тасты­руда және ұлт­тық бірегейлікті ны­ғай­тудағы бұ­қара­лық ақпарат құрал­дарының рөлін, кәсіби этика мәсе­ле­лерін, сон­дай-ақ көп этносты қоғам­да масс-ме­диа мәдениетін дамыту мә­се­ле­­лерін талқылауға байланысты сөз алды. 

Қалай болғанда да, бірінші кезек­те қоғамдық санаға әсер ететін күш – журналистика. Қоғам­дық пікірді қалыптастыратын ақпарат құралдарының өкілдері болғандықтан, ақпаратты айқын, әділ, нақты әрі жедел жеткізуде журналистің кәсіби біліктілігі күн өткен сайын сынға түсіп келеді. 

Тілшілер қауымына тегін сабақ үйрететін форумның Ассамблея ұйымдастырып отырған кезекті жиынының жөні тіпті бөлек. Халықаралық басқосуды құттықтау сөзімен ашқан Дархан Мыңбай: «Рухани жаңғыру идеясының аясында өткізіліп отырған жиынның «Сананың ашықтығы» деп аталуы­ның мәні зор. Бұл ең алдымен, жетістікке жету жолы. Рухани жаң­ғыру ашық сана, ізгі оймен қатар жүреді. Елімізге шетелден келген сарапшылар көпұлтты мемлекет жағдайында журналистиканың қалай дамып отырғанын өз көзімен көріп, тәжірибе үйреніп, пайдалы ой түйіп отыр. Этносаралық мәселе өте нәзік, шетін мәселе болып есептеледі. Этнос туралы айтатын журналист ең алдымен этика нормалары туралы білуі тиіс. Бұл тақырып журналистен өте объективті болуды, жан-жақты зерттеп, зерделеп барып көтеруді талап етеді. Ұлт, ұлыс туралы идея­лар, ұлтаралық қарым-қатынас мәселесін БАҚ бетінде көтерудің, жазудың, сараптаудың қыр-сыры, иірімдері осындай алаңдарда айтылып, талқыланады. Болашақ журналистерді даярлауда және оларға дұрыс бағыт-бағдар беруде тек студент жастар үшін ғана емес, кәсіби журналистерге де мұндай медиа форумдардың беретін пайдасы зор», деді. 

Форум аясында отандық және шетелдік спикерлердің шеберлік сабақтары, TEDх конференциясы, этностық БАҚ көрмесі өткізілді. Ал жиын соңында Қазақстан хал­қы Ассамблеясының журналис­тика саласында жыл сайын өткі­зетін «Шаңырақ» байқауының жеңім­паздары марапатталды.

Айгүл АХАНБАЙҚЫЗЫ,
«Егемен Қазақстан»

АЛМАТЫ