Алматыда «Ғылыми-медициналық қоғам» қоғамдық бірлестігінің ұйымдастыруымен Әлеуметтік-медициналық форум болып өтті. Бұл шараның барысында вакцинация және онкологияға қатысты айрықша шиеленіскен сауалдарды талқылау мүмкіндігімен ашық әңгіме өткізудің тиімді екендігін көрсете білді. Форумға қатысқан медициналық қызметкерлер пациенттермен және балалардың ата-аналарымен қарым-қатынас жасаудан баға жетпес тәжірибе алып отырғанын, сонымен қатар дәрігерлік қабылдау барысында талқылауға мүмкіндік бермейтін күрделі мәселелер бойынша пікір алысты. Онда балалар онкологиясы жетістіктері, проблемалары мен перспективалары жөнінде әңгіме қозғалды. «Вакциналау – дені сау ұлт» деген тақырыпта қатысушы жұртшылық сауалдарына мамандар толымды жауаптар берді. «Кел, ертегі суретін саламыз!» атты балалар суреттерінің еліміз бойынша өтіп жатқан байқауының қорытындысы шығарылды. Форум қонақтарының алдында Алматы қаласы балалар хирургиясы мен педиатриясы ғылыми орталығында ем қабылдап жүрген бүлдіршіндердің күшімен Қазақстанға еңбек сіңірген ұстаз Мұқан Қуатбаевтың «Батыл вакцина» қойылымы көрсетілді. Өнер көрсеткен бүлдіршіндер арасында Вика Тимофеева, Батырхан Жүсіп, Әмира Рысмаханованың өнерлері шынайы шықты.
«Сену және өмір сүру» атты әлеуметтік-медициналық форум түрлі медициналық салаларда ақпараттық қолжетімділікті дамытуға және сауықтыру қызметтерін, жұқпалы және ісік ауруларының алдын алу, диагностикалық, емдеу жетістігінің аясындағы жаңа табыстарды көпшілікке таратуға, сонымен бірге саламатты өмір салтын насихаттауға үлкен ықпалын тигізетінін көрсетіп отыр. Балалардың қылқаламынан шыққан суреттегідей өмір де мөлдір күйінде әдемі бола берсін деп тіледік. Өйткені олар егемен еліміздің ертеңі ғой.
Сапарбай ПАРМАНҚҰЛ,
«Егемен Қазақстан»
АЛМАТЫ
