ҚАЗАҚТЫ ӘЛЕМГЕ ТАНЫТУ АЛПАУЫТ ЕЛДЕРДЕГІ АТАҚТЫ ЖЕҢІСТЕР АРҚЫЛЫ ҚАЛЫПТАСАДЫ

Жұма күні Лас-Вегастағы кә­сіпқой бокс кешінде қазақстандық былғары қолғап шебері Бейбіт Шүменов WBA нұсқасы бойынша әлем чемпионы атағын жеңіп алды. Испандық Габриэль Кампильо бұған өткен жылы тамызда Қазақ елінде ие болған. Лас-Вегас рингіндегі 12 раундқа созылған жекпе-жектің қоры­тын­ды­сы бойынша төрешілердің есебі екіге жарылыпты. Мысалы, олар­дың екеуі Б.Шүменов ұтты десе (117-111 және 115-113), біреуі Г. Кампильо жеңіске жетті (117-111) деп төрелік айтқан. Осыны бетке ұстаған испандық боксшының промоутері Сэмпсон Лев­кович әділ қазы­ларға айып салдырып, оларды бұ­дан былай төрелік ету құқынан айыру үшін WBA ұлықтарына қарсылық жаз­бақшы. Егер де оның арызы дұрыс деп қабылданса, екі мықтының арасындағы қарымта кездесу тағы да өтетіні белгілі. Дегенмен, Бейбіт Шүменов өз елін­дегі енді дамып келе жатқан кә­сіпқой бокс мектебінің де осал емес екенін АҚШ-тың ең атақты рингінде танытты деуге әбден болады. Көсемәлі СӘТТІБАЙҰЛЫ. Жағымды жаңалық ПӘТЕР КІЛТТЕРІ ТАПСЫРЫЛДЫ Отбасын құрап, шаңырақ көтерілген­нен кейінгі адамға қажеттісі баспана. Бүгінгі қаржы дағдарысы кезінде екінің бірі үй салып, әлеуметтік-тұрмыстық қажетін өтеуге, жағдайын жақсартуға мүмкіндігі бола бермейтіні анық. Сон­дық­тан да Президент Нұрсұлтан Назар­баевтың халыққа жолдауларында тұрғын үй бағдарламасына байланысты жүргі­зіл­ген жұмыс барысында әлеуметтік жағы­нан жеткіліксіз қамтылғандар мен мем­ле­кеттік және бюджеттік сала қызмет­кер­лерін баспанамен қамту мәселелері оң шешімін тауып келеді. Өткен жылы Талдықорған қаласында жалпы көлемі 4,5 мың шаршы метрді құрайтын екі тұрғын үй салынып, қосымша 80 пәтерлі жатақ­хана күрделі жөндеуден өткізіліп, баспа­наға мұқтаж жандарға берілген болатын. Жаңа жылда еліміздегі тұрғын үй қа­ты­настары заңына сәйкес жоғарыдағы та­лаптарға сай кезекте тұрған мұқтаж жан­дарға 20 пәтерлі үйдің кілттері тапсы­рыл­ды. Арендалық үйдің бір бөлмелі пәтеріне коммуналдық шығындарын қоспағанда, айына орта есеппен 4000 теңге, екі бөлмеге 8000 теңге, үш бөлмеге 12000 теңге арендалық төлем төленеді екен. Пәтер кілттерін салтанатты түрде жаңа қоныс иелеріне тапсырған облыс әкімі Серік Үмбетов қаңтар айының соңында тағы да 45 пәтерлі коммуналдық үй пайдалануға берілетінін жеткізіп, жаңа жылда шаңырақтарыңызда шаттық болып, бүгінгі қуаныш молая берсін, деген тілекпен елді бір серпілтіп тастады. Сапалы салынған пәтерлерге кірген­дер өздерінің қуаныштарын жасырмай Елбасына деген ыстық ықыластарын білдіріп, шашу шашып, бірін-бірі құттықтап жатты. Күмісжан БАЙЖАН, Алматы облысы. Бір ауыз сөз ОЙДЫ ОЙ ҚОЗҒАЙДЫ Жетпіс жылдан бергі ақыл­шым “Егеменде” жарияланған павлодарлық профессор, фило­логия ғылымдарының докторы Қуандық Мәшһүр-Жүсіптің: “Жаңа жылда оқырманның сүйікті газетінен тың ойлар күтуі заңды құбылыс”, дегенін құптай отырып, “cоциализмнен без­геннің жөні осылай екен деп, социализм кезінде жеткен рухани табыстарымыздан, игі дәстүрлерімізден бас тарта беруіміз қалай болар екен?” деуін салиқалы ой деп ұқтым. Асылы, адамды адами көр­кем­дікке баулудағы күшті руха­ни тәсілдің бірі сын ғой. Тіпті, жас сәби тәй-тәй басқаннан: “Құлайсың, олай етпе, былай ет! Мынау жаман, мынау жақсы”, деп мейірбандық таныту – сын­ның әліппесі емес пе еді. Сәби­дің жан-жағын барлап, ой жүгір­туі осылай ширамас па! Сондық­тан да бабаларымыз: “Сын тү­зел­­мей, мін түзелмейді”, деп түй­ген. Бұл – нағыз адам болу­дың алғашқы қадамы өзіңді өзің сынаудан басталады деген сөз. Социализм дәуіріндегі руха­ни жетістіктеріміздің бірі талай даналар айтып кеткен: “Сын мен өзара сын – қоғамның қоз­ғаушы күші”, деген қағида еді. Меніңше, сын мен өзара сын – қоғамды сауықтырушы, оны сан алуан дерттен тазартушы күш. Адам да жуынып-шайынып, тазарып тұрмаса, тәнін кір басады, дертке шалдығады. Сондай-ақ, өзіне сын көзбен қарай алмаған қоғамның, сөйтіп, табиғи жат қылықтардан арыла алмаған қоғамның құрдымға кеткеніне тарих куә. Біздің қоғамдағы аса жа­байы, жат қылықтар: адам­дар­дың жан-тәні жалаңаштанып, жадағайла­нып барады. Осындай шақта пен­денің ар тазалығын, асқақ рухын қалай сақтап қала аламыз? Ардан туған, арман қу­ған аяулы азамат­тарды сатқын­дық, сұрқиялық құрбандығынан қайтсек құтқара­мыз? Қоғамға жат осындай дерт­тің дендеуі қоғамдағы сын мен өзара сынның әлеуметтік өмірі­мізден аласталуынан деп ұғамын. Мен, қарт журналист қазіргі бұқаралық ақпарат құрал­да­ры­н­да парақорларды, жемқор­лар­ды, зымиян алаяқтарды әшке­релейтін сынның аздығына таңданамын. Жемқорлыққа қарсы күресу­ге шақырған он ұраннан алаяқ­тардың бет пердесін сыпыра­тын­дай журналистің бір сыны артық деп білемін. Өйткені, атақты Марк Твен: “Дүниеге жарық беріп, сәуле шашатын екі-ақ күш бар. Оның бірі – аспандағы Күн, екіншісі – жердегі Журналист” деп еді ғой. Ғайыс ЕГЕМБЕРДИЕВ, соғыс және еңбек ардагері. Талдықорған.