Мұндағы мақсат – қазіргі таңда баянды бағытқа жол сілтеп отырған еліміздегі саяси бастамаларды қолдау және Елбасының рухани жаңғыруға ұласқан бағдарламалық мақаласына үлес қосу дейді, ұйымдастырушылар.
Өткен күндер белесіне үңілсек, еліміз тәуелсіздігін жариялаған 1991 жылдың 16 желтоқсанынан кейін, арада аз ғана күн өткенде, яғни 1992 жылдың 10 қаңтары күні Елбасы Нұрсұлтан Назарбаев дүние жүзінде өмір сүріп жатқан қазақ бауырларына Үндеу тастап, атажұртына шақырды. «Расында бүгінгі күні әлемде өздерінің шеттегі қандастарын тарихи отанына қайтарып алып отырған үш мемлекеттің бірі – Қазақстан. Мемлекет басшысының басқасын айтпағанда тек осы ісі-ақ оның ұлт тарихынан ойып орын алуына жетіп жатыр», деді жиын үстінде сөз алған Парламент Мәжілісінің дептутаты Бекболат Тілеухан.
Сол сияқты конференцияның тағы бір қадірлі қонағы мемлекет және қоғам қайраткері Мырзатай Жолдасбеков «Әлемде туған жеріне қаққан қазықтай байланған бір халық болса, ол қазақ еді. Тағдырдың сойқан желі сол қазақты қазығынан айырды» деген жүрекжарды сөзін көпшілікке арнай отырып, 1992 жылы Алматы қаласында өткен дүние жүзі қазақтарының алғашқы құрылтайын ұйымдастыру комиссиясының төрағасы болғанын, осы жиын барысында әлемнің шартарапына шашылып кеткен қазақ туғандардың атажұртына деген ыстық ықыласы мен сартап сағынышына куә болғанын, тіпті сонау Алтай айналып, Анадолының топырағын басып келген қазақ ақсақалы ұшақтан түсіп, табаны жерге тиген сәтте жата қалып, қара жерді сүйгеніне куә болғанын аса бір тебіреніспен жеткізді.
Өз кезегінде сөз алған республикалық Ардагерлер кеңесі төрағасының бірінші орынбасары, қоғам қайраткері Өмірзақ Озғанбаев, бұл басқосудың мұраты халықты бірлік пен берекеге жұмылдыратын игі бастама болғай деп баталы тілегін арнаса, алаштанушы ғалым, академик Дихан Қамзабекұлы, кез келген құрылтай-конференция қазақтың тұтастығын сақтау үшін жасалуы керек, сонымен қатар оралман бауырларымыздың ұлт бірлігі мен азаматтық қоғамдасу дәстүріне қосып отырған үлесі зор дегенге тоқталды.
Басқосу соңында конференцияның күн тәртібіне қойылған бірлестіктің басшылық құрамын бекіту мәселесі бойынша жиынға қатысуышылар бірауыздан «Тарих атажұрт» бірлестігінің төрағалығына Өзбекстан елінен оралған бауырымыз Ғалым Пернебаевты лайық деп таныды.
Көпшілік қауымның алдында міндет жүктеген Ғалым Пернебаев болашақта қазақ халқының ынтымақ-бірлігі үшін жұмыс жасайтынын, Мемлекет басшысының саясатын қолдап, сырттағы қазаққа елдегі салиқалы саясаттың дұрыс жетуіне ықпал ететінін айтып, қоғамдық бірлестіктің алда атқаратын жұмыстарымен таныстырды.
Бекен ҚАЙРАТҰЛЫ,
«Егемен Қазақстан»
Суретті түсірген
Орынбай БАЛМҰРАТ,
«Егемен Қазақстан»
