«100 нақты қадам» Ұлт жоспарында кәсіби мемлекеттік аппарат құрудың жолдары нақты атап көрсетілген. Олардың ішінде «Ашық үкіметті» енгізу, мемлекеттік органдар басшыларының халық алдында есеп берулерін тәжірибеге енгізу, азаматтардың шешім қабылдау үдерісіне қатысу мүмкіндігін кеңейтуге басымдық берілген. Петропавл қаласы мен барлық аудандарда ұйымдастырылған «Ашық есік күні» өз деңгейінде өтіп, толғақты проблемалар мен шетін мәселелер бірлесіп талқыланды. Облыс тұрғындары тарапынан жер телімдерін алу, сапалы ауыз су жеткізу, ауылдарда кәсіпкерлікті дамыту, тұрғын үй-коммуналдық шаруашылық жайы көбірек қозғалды.
Әкімнің қабылдауына келгендердің бірі Уәлихан Ибраев мүгедектер үшін жылжымалы монша ойлап тапқанын, жоба ЭКСПО-2017 мамандандырылған халықаралық көрме шеңберінде өткен байқауда жоғары бағаланғанын, енді қаржылық қолдау қажеттігін жеткізді. Аймақ басшысы Құмар Ақсақалов жеке кәсібін ашқысы келген оған көмек көрсетілетінін, қолдау жасалатынын айтып, озық идея авторын қуантып тастады. Алевтина Онищенконың айтпағы құрылыс жұмыстарындағы бей-берекетсіздік екен. Көпшіліктің демалыс орнына, балалардың ойын алаңына айналған шағын бақ аумағы жеке кәсіпкердің иелігіне өтіп кеткен. Өңір жетекшісі мәселенің анық-қанығына көз жеткізу үшін тұрғындармен арнайы кездесетінін қадап айтты.
Арыз айта келгендердің бірі Болат Еспановты баспана жайы алаңдатады екен. Ол «Береке» шағын ауданында жер үй салғанын, ол аумаққа мектеп құрылысы жүргізілетіндіктен оны бұзу жөнінде қалалық әкімдік шешімі шыққанына шағымданды. «Бензострой» аумағында көп қабатты үйлер, басқа да мәдени, әлеуметтік нысандар тұрғызылып, әсем қалашық бой көтеріп келеді. Ал сіздің мәселеңізге келсек, еш алаңдамауға болады. Сырылған үйлердің иелеріне өтемақы төленеді немесе пәтер беріледі, деді Құмар Іргебайұлы.
– Халық пен билікті жақындастыратын жүзбе-жүз кездесулер жұмыстың тиімділігін арттырып, тікелей байланысты қамтамасыз етеді. Қозғалған мәселелердің бірде-біреуі аяқсыз қалмайды. Бірқатары қолма-қол шешімін тапты. Әкімшілік кедергілер мен бюрократтық көріністерді мүмкіндігінше азайтатын мұнадай қоғамдық қабылдау тоқсан сайын өткізілетін болады, – деді Қ.Ақсақалов БАҚ өкілдеріне берген сұхбатында.
Өмір ЕСҚАЛИ,
«Егемен Қазақстан»
Солтүстік Қазақстан облысы
Суретті түсірген
Талғат ТӘНІБАЕВ
