Сенат Төрағасының Санкт-Петербургке жасаған сапарында жалғасын тапты
Қазақстан Республикасы Парламенті Сенатының Төрағасы Қайрат Мәми кеше Тәуелсіз Мемлекеттер Достастығына қатысушы мемлекеттердің Парламентаралық ассамблеясы (ТМД ПАА) кеңесінің Санкт-Петербургтегі отырысына қатысты. Сондай-ақ Сенат Төрағасы сапар аясында бірқатар екіжақты кездесулер өткізді.
Осы сапарын қазақстандық парламентшілер Жамбыл көшесінің бойынан орын тепкен Жамбыл Жабаевтың ескерткішіне гүл шоқтарын қойып, ақын рухына тағзым етуден бастады.
Түстен кейін Қайрат Мәми ЕурАзЭҚ ПАА жауапты хатшысы П.Зверевпен жүздесті. Жауапты хатшы Сенат Төрағасына Парламентаралық Ассамблея жұмысын жан-жақты әңгімелеп берді. Ал Украина Жоғарғы Радасының Төрағасы В.Литвинмен болған кездесу барысында елдер арасында түсіністік пен сенім қалыптасып отырғандығы тілге тиек етілді. Әлемдік қаржы дағдарысы барысында сауда айналымы бәсеңсігенімен, үстіміздегі жылы ол қайта жанданды. Қазіргі кезде Астана мен Киев арасында парламентаралық байланыстар дамып, заң шығару тәжірибесімен алмасу үлкен маңызға ие болып отыр. Екі ел парламентшілері ЕҚЫҰ ПА мен ТМД ПАА шеңберінде екіжақты және көпжақты форматта өзара ықпалдастықты дамытып келеді. Осы орайда Сенат Төрағасы әріптесін Украинаның 2013 жылы ЕҚЫҰ-ға төраға болып сайлануымен құттықтай келіп, украиналық байқаушылардың Қазақстандағы сайлауларға объективті баға беруіне ризашылығын жеткізді.
Сонымен қатар Сенат Төрағасы Қ.Мәмидің Тәжікстан Республикасы Оли Милли Маджилисінің Төрағасы М.Убайдуллоевпен және Беларусь Республикасы Ұлттық жиналысы Республика кеңесінің Төрағасы А.Рубиновпен кездесулері болып өтті. Оның барысында екіжақты қатынастарды тереңдету және парламентаралық байланыстарды одан әрі нығайту мәселелері жан-жақты әңгіме өзегіне айналды.
Асқар ТҰРАПБАЙҰЛЫ.