Жақында Семей қаласында Қазақстанның еңбек сіңірген жаттықтырушысы Болат Тұрлықанов мемориалының аясында грек-рим күресінен ҚР кубогы болып өтті. Бұл дүбірлі жарыс осымен 17-ші рет өтіп отыр. Лондон Олимпиадасы алдындағы маңызды жарысты Семей қаласының әкімі Айбек Кәрімов ашып: Халқымыздың даңқты балуаны Дәулет Тұрлықановты тәрбиелеп, баптаған Болат ағаны еске алуға арналған ел кубогы жарысы жыл сайын тартысты өтеді. Бұл жолы да кілең сен тұр, мен атайын дейтін саңлақтар жиналып отыр. Жарысқа қатысып отырған 149 балуанның бәрі мықты. Ендеше сіздерге сәттілік тілеймін. Лондон Олимпиадасы иек астында, қазақ елінің көк байрағын асқақтата беріңіздер – деді.
– Ерке Ертістің бойындағы қос қала Өскемен мен Семейдің экономикасы қатар дамып келеді. Ел Тәуелсіздігінің 20 жылдығы қарсаңында облыс әкімі Б.Сапарбаевтың бастамасымен талай игі шаралар өтіп жатыр. Соның бірі – кешеден бері Семейде «Туған елге – тағзым» акциясы бойынша өтіп жатқан мәдени шара күндері. Екі күн бойы Семейді ән мен күйге бөледік. Ауыл шаруашылығы жәрмеңкесі өтуде. Ал мынадай дүбірлі жарысты тамашалаудан қалай тыс қалайық? Дәулет ініміздің әкесі Болат ағаны жақсы білеміз, кезінде ол кісі де сан рет ел біріншілігінде топ жарған. Ендеше жас ұрпақтың алатын өнегесі де аз емес, – деп ағынан жарылды Өскемен қаласының әкімі Ислам Әбішев.
Бұдан кейін Олимпиада чемпионы Жақсылық Үшкемпіров пен Дәулет Болатұлы сөз алып, кубокты сарапқа салушы балуандарға сәттілік тіледі. Грек-рим күресінің балуандары қазір Олимпиада ойындарының үш жолдамасына ие. Ал еркін күрес, қыздар күресі бойынша балуандар тағы алты жолдаманы жеңіп алған. Келер жылы көктемде Астанада лицензия беретін Азия халықаралық жарысы өтпек. Сол дүбірлі бәсекеде тағы 9 лицензияны иеленсек, асығымыз алшысынан түседі, – деді Дәулет Тұрлықанов. Бұдан кейін ол бапкер А.Қасымжановқа ҚР еңбек сіңірген жаттықтырушысы атағын табыс етті. Ал Жақсылық Үшкемпіров өзінің тұңғыш бапкері Ром Ильматовқа ата салтымен шапан жауып, сый-сияпат жасады.
Семей қаласының өнерпаздары акробатикадан өнер көрсетіп, ұлттық нақышта би билеп, әннен шашу шашқан соң жарыс басталып кетті.
Ойды ой қозғайды. Баку қаласында өткен Әлем біріншілігінде грек-рим күресі балуандары бірнеше медальді иеленді. Алайда 1996 жылы Атланта Олимпиадасынан кейін балуандарымыз алтын алқаны түстерінде ғана көретін болды. Сол жолы тек Ю.Мельниченко алтынға қол жеткізген. Ендеше Лондонда сол кемшіліктің орнын толтыра аламыз ба?
Мемлекеттік жаттықтырушы Жаңаберген Қармандаевтың айтуынша, бұл жолы кубок жарысында жастар жарқырап көрінуі тиіс. Ақтөбелік Асхат Құдайбергенов, оңтүстікқазақстандық Марат Кәрішалов, алматылық Алқадыл Өзтиев, астаналық Елдар Қайратов, тағы басқалар бабында көрінеді. Күні ертең олар тұманды Альбионда топ жарып жатса, тақияға тар болмас еді. Расында да, ақтық сайыста белдескен Марат Кәрішалов пен Жақсылық Айтбаевтың тактикалық шеберлігі мен әдісі тең болды десек, қателеспейміз. Алайда Марат сәл басымдық танытып, жеңіске жетті. Ал 66 кило салмақта Елдар Қайратов (Астана) Алматы облысының өкілі белгілі балуан Дархан Баяхметовтен бір ұпай ғана басым түсіп, чемпиондық атақты қағып кетті. Дархан қызуқандылық танытқанымен соңынан сабырға түсіп, жеңілгенін мойындады. Бұдан кейін өз салмақ дәрежелерінде Е.Қоңыратов, М.Өзтиев, А.Дінмұхамедов тәрізді балуандар жеңімпаз атанды.
Командалық есепте бірінші орынды Оңтүстік Қазақстан облысының балуандары иеленді. Қостанай және Алматы облыстарының балуандары екінші, үшінші орындарға табан тіреді. Кубок жарысынан байқағанымыз, бір кездері Шығыстың жігіттері топ жаратын. Осы жолы төртінші орынға әрең ілікті. Мойындау керек, Асқар Можанов облыстық дене тәрбиесі және туризм басқармасына жетекшілік еткен тұста талай талантты балуандар, тіпті басқа спорт түрлері мамандары мен талантты тарландар күнкөріс қамымен басқа өңірлерге ауысып кетті. Бұл кемшіліктің орнын басқарманың жаңа бастығы Марат Сүлейменов толтырады деген ойдамыз. Оған Мараттың шеберлігі мен біліктілігі жетеді.
– Шынында да, көптеген спортшылар басқа жаққа түрлі себептермен ауысып кеткен. Айбек Еңсеханов, Досжан Картиков, Әсет Мәмбетов, Марид Муталимов, Дархан Баяхметов секілді жерлестеріміз басқа облыстардың намысын қорғап жүр. Талантты спортшыларды кері қайтарып алып жағдайларын жақсартуға тырысудамыз. Ал біздің Олимпиада үмітіміз үш рет қарғып секіруден әлем чемпионы Ольга Рыпаковадан, ауыр атлетикада Дмитрий Каплиннен, Лондонда алтын алқа күтеміз. Басқа саңлақтар да оған үлес қосады деген үміттеміз, – дейді облыстық дене тәрбиесі және туризм басқармасының бастығы Марат Сүлейменов.
Діттеген межеден шықтық деп ойлаймыз. Үміт күткен жастар сенімді ақтады. Нұрмахан Тіналиев Мәскеуде атақты балуандармен бірге Лондон Олимпиадасына арнайы жаттығуда. Оларды бұл жарысқа қатыстырмадық. Келер жылы көктемде Астанада өтетін халықаралық жарыста тағы 9 лицензияны жеңіп алсақ, ұтарымыз анық, – дейді атақты балуан Дәулет Тұрлықанов.
Оңдасын ЕЛУБАЙ.
Семей.
––––––––––––
Суретте: марапаттау.