Әу баста үлкен ауыл болғанымен адамдар көше-көше, елді мекен де қусырылып қалған. Қазір ауылда барлығы 455 адам тұрады, бастауыш мектеп пен клуб қана бар. Соған қарамастан ауыл «ҚазТрансГаз» акционерлік қоғамының «Қостанай облысының елді мекендерін газдандыру және газ тарату желілерін жаңғырту» инвестициялық жобасы аясында газға қосылды. Ауыл адамдарының көңіл күйі де өзгеріп сала берді.
Наталья Сосновская жасынан осы ауылда тұрып келеді. Зейнеткерлікке шыққанша бастауыш мектеп директоры қызметін атқарды. Қазір ауылдың ардагерлер кеңесіне жетекшілік етеді, қоғамдық жұмысқа да ұйытқы, белсенді. От жағу, көмір түсіру, газ баллонын сатып алу, қосу секілді жұмыстардың барлығы да тұрғындарға қиын екенін біледі, өзі де сол жұмыстардың барлығын бастан өткерді. Көгілдір газ үйіне кіргелі қолы ұзарып, оның рақатын көріп отыр.
– Біз бұған дейін ас әзірлеу үшін көбіне электр қуатын, газ баллонын пайдаланып келдік. Қысқы борандарда, көктемде дауыл соққан күндері электр жарығы өшіп қалады, ал газ баллоны дәл қажет кезде таусылып қалады. Газ баллонының қауіптілігі өз алдына әңгіме. Баллонның газы азайған кезде иісі шығып, басымызды ауыртатын. Енді табиғи газ қосылғаннан кейін бұл қиындықтар артта қалды деп есептеймін. Қазір үйіміз жылы, өмірдің рақаты деп осыны айт, – дейді Наталья Николаевна.
Селоны газға қосу үшін 6,9 шақырымға тарта көшеаралық газ құбырлары салынды. Ауылдағы 155 жеке үйдің 49-ы газға қосылды, тағы 4 үйдегі монтаж жұмыстары толығымен аяқталды. Демек тағы да 4 үй көгілдір отынмен қамтылады деген сөз.
– Ворошилов секілді халық саны аз ауылдардың газға қосылуында үлкен мән бар. Бірінші кезекте ауа тазарады, тұрғындар көмір тасып, ағаш жарудан құтылады. Демек адамдардың өзге маңызды шаруаларға көбірек уақыты бөлінеді. «ҚазТрансГаз» компаниясы үлкен жұмыс атқарды. Екі жылда облыста 600 шақырым газ құбыры салынады, 50 мыңнан астам тұрғыны бар 8 елді мекенге газ беріледі. Осының арқасында облыста көгілдір отынның игілігін көрген тұрғындар саны 10 пайызға артады, – дейді облыс әкімінің бірінші орынбасары Ғауез Нұрмағанбетов.
Елбасының тапсырмасы бойынша елімізді газдандырудың бас жоспары бекітілген болатын. Сонымен қатар 2015 жылдың қараша айында Мемлекет басшысының өндірістік процестерді тұрақтандыру жөніндегі тапсырмасы аясында, өңірдің тұрақты экономикалық өсуін қамтамасыз ету, газбен жабдықтау және экологиялық ахуалды жақсарту, газ құбырларының қалыпты жағдайда жұмыс істеуін қамтамасыз ету мақсатында «ҚазМұнайГаз» ұлттық компаниясы» АҚ, «ҚазТрансГаз» АҚ және Қостанай облысы әкімдігі арасында меморандумға қол қойылды. Сол келісімге сәйкес, өткен жылы 13,5 мыңнан астам тұрғыны бар Қашар және Октябрь кенттері газдандырылды.
– Елбасы тапсырмасын жүзеге асыру аясында «ҚазТрансГазАймақ» ұлттық операторы биыл Ворошилов селосынан кейін Қарабалық ауданындағы Тоғызақ, Денисов ауданындағы Алчанов, Антонов селоларын да газбен қамтамасыз етеді. Әр үйдің алдына газ құбыры келіп тұр, – деді «ҚазТрансГаз Аймақ» АҚ директорының орынбасары Мұқан Сәдуақасов.
Бүгінде Қостанай облысы тұрғындарының 55 пайызы көгілдір отынды пайдаланып отыр. 170 мыңнан астам абоненттің 1656-сы заңды тұлғалар, үй саны 168 624 болды. Алдағы екі жылда олардың саны 220 мыңға жеткізіледі.
Нәзира ЖӘРІМБЕТ,
«Егемен Қазақстан»
ҚОСТАНАЙ
Суретті түсірген
Екатерина АФАНАСЬЕВА
