Осы орайда Қазақстан халқы Ассамблеясы үстіміздегі жылдың 12 қаңтарында Қазақстан Республикасы Президенті Н.Ә.Назарбаевтың «Төртінші өнеркәсіптік революция жағдайында дамудың жаңа мүмкіндіктері» атты Жолдауын талқылау бойынша республикалық бірыңғай күн өткізгенін атап көрсеткен жөн.
Ассамблея өткен жұма күні Алматыдағы Достық үйінде Елбасының Қазақстан халқына Жолдауын талқылап, түсіндіру үшін Бірыңғай тақырыптық күнін өткізді.
Алматыдағы іс-шараға Қазақстан халқы Ассамблеясы Төрағасының орынбасары Абилфас Хамедов тәуелсіз Қазақстан өмірінде, толассыз зулап жатқан уақыт бедерінде түрлі мақсаттар мен көп қырлы, жан-жақты жоспарлы тапсырмалар туындап жататынын және мұның бәрі Жолдауда көрініс табатытын айта келе біздің еліміз нақты табыстарға ие: Қазақстан БҰҰ Қауіпсіздік Кеңесіне мүше болды, Дүниежүзілік қысқы Универсиаданы атқардық ЭКСПО-2017 халықаралық көрмесі де сәтті ұйымдастырылды, жыл басында Елбасының бастамасымен конституциялық реформа өтті, ел экономикасын жаңа белеске шығаратын Қазақстанның үшінші жаңғыруына серпін берілді, мазмұны терең, ауқымдылығы бойынша аса құнды «Болашаққа бағдар: рухани жаңғыру» бағдарламалық құжаты бойынша жұмыстар жалғасуда, деді.
– Президент Нұрсұлтан Назарбаевтың биылғы Жолдауы Қазақстанның келешегі үшін өлшеусіз маңызға ие деп есептеймін. Елбасы белгілеп берген мемлекеттік саясаттың стратегиялық бағыттары барлық саланың басты сауалдарына жауап бере алады. Бұл кезекті Жолдау көпұлтты, көпконфессиялы Қазақстанды жаңа кезеңге, жаңа белеске бастайды. Президент пәрмен беріп отырған әрбір тапсырма замана нақтылығын безбендейді. Еліміз үлкен мақсаттарға жету жолындағы тарихи мүмкіндіктерге ие, – деді Алматы қалалық ҚХА төрағасының орынбасары Казбек Мамсуров.
– Адам капиталы туралы айтқан кезде, тек білім мен денсаулық саласын меңземеу керек. Бұл «Болашаққа бағдар: рухани жаңғыру» бағдарламасының жалғасы екенін де ұмытпаған жөн. Мұндай жалғасты жоспарлар қоғамды біртіндеп жаңа белестерге көтереді. Жолдау азаматтарымыздың барлық буынын қамтитын білім беру саласының көкжиегін нақты белгілеп отыр. Біздің қоғамның негізгі күші тарихты да, тілді де, мәдениетті де білетін қазақстандық болуы керек, – деді Қазақстан күрдтерінің «Барбанг» қауымдастығының төрағасы Князь Мирзоев.
Осылайша Қазақстан халқы Ассамблеясының еліміздің түкпір-түкпіріндегі Жолдауды талқылауға қатысты Бірыңғай күні – әлеуметтік-экономикалық табыстың негізінде азаматтық татулық, ұлтаралық және конфессияаралық келісім жатқанын кезекті рет айқындап отыр.
Сондықтан да бүкіл ел бойынша Достық үйлерінің базасында Ассамблея кеңестері, ғылыми-сарапшылық топтар, Қоғамдық келісім, Ақсақалдар, Аналар кеңестері, ҚХА жастар қанаттарының отырыстары, конференциялар, дөңгелек үстелдер, сарапшылармен кездесулер сынды іс-шаралар өтті. Бұл жиындар тек облыс орталықтарында және ірі қалаларда ғана емес, сондай-ақ аудандарда, кәсіпорындар мен жоғары оқу орындарында да жалғасты.
Ел Президентінің Жолдауын талқылауға Қазақстан күрдтерінің «Барбанг» қауымдастығы, Алматы қалалық ҚХА филиалы, Алматы корейлері ұлттық орталығы, қазақстандық орыстардың мәдени орталығы, Алматы қалалық «Ахыска» түрік орталығы қатысты.
Тап сол кезде Ақтөбе қаласында, Қазақстан халқы Ассамблеясы Төрағасының орынбасары Сергей Вишняктің және Қазақстан халқы Ассамблеясы мүшелерінің, ғылыми-сараптамалық топ, қоғамдық келісім, Аналар кеңесі, 19 этномәдени бірлестік өкілдерінің қатысуымен облыстық ҚХА Кеңесінің кеңейтілген отырысы болып өтті.
Атырау, Шығыс Қазақстан, Қостанай және басқа да облыстарда Бірыңғай күн шеңберінде аудандық маңызы бар қалалар мен ауылдарда өзін-өзі басқарудың дербес бюджеті мен коммуналдық меншігін енгізу сынды халықтың өзекті мәселелерін шешу жолдары талқыланды. ҚХА үшін ауылдық округтер мен ауылдар деңгейінде құрылған Қоғамдық келісім кеңестері жергілікті міндеттерді шешуде жаңа мүмкіндіктерге ие болатындығы маңызды.
Бірнеше облыста (Қарағанды, Қызылорда, Маңғыстау және т.б.) Парламент Мәжілісінің Ассамблеядан сайланған депутаттарының (С.Абдрахманов, Н.Жұмаділдаева, А.Мурадов, Ш.Нурумов және т.б.) қатысуымен облыстық селекторлық жиын өткізілді. Олар Жолдаудың түйінді мәселелеріне қатысты өз көзқарастарын білдіріп, тұрғын үй құрылысы, банк саласы, білім беру мен әлеуметтік салаға заманауи технологияларды белсенді енгізу мәселелерінің маңыздылығын атап көрсетті. Бірегей электронды еңбек биржасын енгізудің мәнділігін, онда бос орындар мен жұмыс іздеп жүрген тұлғалар туралы барлық ақпарат шоғырландырылуы тиіс екендігін, «Баршаға арналған тегін кәсіптік-техникалық білім беру» жобасын іске асырудың қоғамға қажеттілігін сөз етіп, әлеуметтік даму мәселелеріне көңіл бөлді.
Бірыңғай күн шеңберінде өткен Қазақстан халқы Ассамблеясының 147 іс-шарасына 7300-ден астам адам қатысты.
Айнаш ЕСАЛИ,
«Егемен Қазақстан»
АЛМАТЫ
